SV Dakota ta bon prepara y entusiasma cu e prome campeonato di e liga anteriormente conoci como “LIFIDA” cu a conoce e transicion recientemente pa bira parti di e programa di AVB, Arubaanse Voetbalbond. Pa 30 aña dirigentenan fuerte manera Buchi Panama a haci un excelente trabao cu LIFIDA y SV Dakota ta gradici y aplaudi nan cu e logro di pone y mantene LIFIDA na un nivel halto.
Presidente di SV Dakota, Harvey Clement ta agrega cu e ta na cada lider, coach y mayor pa sigui mantene e teamnan y e liga fuerte, hunto cu AVB.
SV Dakota su team tambe ta forma parti di e campeonato cu a cuminsa siman pasa y Clement cu entusiasmo a referi na e ceremonia di apertura como un “tremendo defile”, cu a inclui hopi mucha, hopi team, cual ta indica cu e teamnan ta bon bezig y riba bon caminda.
Harvey Clement ta conclui bisando cu ta esencial pa keda cu e promocion y expansion di deporte na Aruba pa mas tanto mucha posibel ta envolvi den actividad di recreacion sano y asina nan ta keda tambe leu for di actividadnan cu no ta bon pa nan.
SV Dakota ta existi desde aña 1947 caba y durante e su trayectorio a sa di logra conkista e titulo di campeon di futbol division di honor na mas di un ocasion den pasado. Sinembargo, e ultimo biaha cu el a bin cas cu e trofeo tabata na 1995. E organisacion ta conta cu futbolistanan di tur edad, cuminsando cu Mini baby, Baby, Lifida A, Lifida B, Menor, Mayor, Junioren y Hoofdklas. Na tur ta papia di mas o menos 175 hungado den total. Den e seccion di Hoofdklas, ta conta cu un ekipo practicamente nobo cu 25 hungado, 4 staff tecnico y 4 miembro di directiva.