Los Angeles, MERCA- E team di baseball di Reino Hulandes, actualmente hungando den e World Baseball Classic lo hunga su proximo wega otro siman dialuna. Ainda no ta conoci contra ken nan lo hunga, pero esaki lo ta e ganado di pool F. Esakinan ta wordo disputa ainda e siman aki. E otro finalista di pool E, cu tabata a avansa ta Japon, kende lo hunga un dia despues contra e number dos di pool F.
Team Kingdom a inicia nan hornada na Seoul, Zuid- Korea y nan tabata den pool A. Nan prome wega nan a hunga contra di e pais anfitrion y nan a gana e wega aki cu score di 5 pa 0. Siguientemente nan a hunga contra di Chinese Taipei, cual wega tambe nan a gana cu score di 6 pa 5. Despues nan a topa cu Israel, cu a kibra e careda di invicto di Team Kingdom, ora cu nos seleccion Hulandes ta perde 4-2 contra di Israel. Hulanda tambe a cay venci contra di Japon 8-6, den e siguiente buelta di e torneo cual a wordo hunga na Japon. Pero despues Team Kingdom ta bin por la goma y ta gana Israel cu medio di knock out (12-2) den ocho inning. Y despues nan ta gana tambe di Cuba, un biaha mas pa k.o. cu score abrumador di 14-1 (den shete inning).
Asina tambe Team Kingdom ta gana su pase pa final, cual nan prome wega lo ta dia 20 di Maart proximo.