Arizona, MERCA- Diasabra Team Kingdom of the Netherlands a hunga su ultimo wega di fogeo di e campo di entrenamento na Arizon. Mescos cu e dia anterior, LG Twins tabata nan contricante. Unda cu diabierna e wega a termina den un empate, diasabra Twins a bin mas fuerte. Nan ta gana Team Kingdom cu score di 7-4 y asina tambe Team Kingdom ta termina nan entrenamento cu 1-3-1.
Rob Cordemans tabata e pitcher habrido pa Team Kingdom. Ocho dia prome el a haya tres careda en contra den su unico inning, pero diasabra e homber cu desde 1996 ta milita den Oraño a haci un miho prestacion. Den su prome inning LG Twins di KBO di Corea ta tuma e bentaha. Den su di dos y ultimo inning di dia e no a hay’e den problema.
Codemans ta bandona e monticulo cu wega empata na 1. Randolp Oduber ta habri e inning cu doblete y despues di un hit and run di Stijn van der Meer Oduber ta pasa pa tercera base. Yurendell de Caster despues ta dal e bala duro den outfield pa un fly di sacrificio pa cual Oduber ta empata e wega.
Despues di Cordemans, Jair Jurrjens ta subi monticulo. Jurrjens, cu a tira e prome wega di forgea na Arizona, mescos cu su predesecor a tira dos inning y tabata hopi convincente. El a permiti solamente dos base por bola, cu’n velocidad di 92 miya pa ora cu su fastball. Despues di dos inning, Jair Jurrjens ta declara di ta contento cu su picheo y cu el a focus mas ariba e atake riba e batiado. Den e prome ronda di World Baseball Classic, 65 pitcheo ta e limite.
Ofensivamente, Team Kingdom tabata tin dificultad pa crea oportunidad, cu excepcion di Kalian Sams cu un doblete, despues di e prome entrada. Den e di 5 inning, e Coreanonan a tuma un bentaha di 3 -1 riba Team Kingdom. Shairon ta permiti su prome homber ariba base, embasa ariba un eror di shortstop Gianfranco Wawoe. E siguiente batiado a haya base por bola y despues ambos lo score. Martis ta limita e daño den e di 5 inning door di saca un coredo cu a hala mucho leu for di base.
Den e di seis inning Twins ta coy bentaha cu 1-4. Martin tabata tin dificutlad, pero un groundbal ta yega na e momento husto, cual ta conduci un out, door di un double play 6-4-3 y asina e inning ta termina. Phildrick Llewellyn Jr, bon pa 2 hit, ta habri e inning cu un di dos hit y asina e ta drenta ariba un hit di Curt Smith. Smith despues ta wordo saca out na home y asina e inning ta cera cu 2-4.
Despues di un bon inning di Kevin Heijstek, ta empata e partido den di shete. Atrobe Llewelyn ta hunga un rol importante den e hugada. E ta dal un hit, pa cual Wawoe ta score pa haci e score 3-4 cu su di dos hit di dia, mientras cu apenas el a drenta den di 5 inning. Randolph Oduber siguientemente ta score e careda di empate riba un fly di sacrificio di De Caster.
Cu Tom de Blok y Loek van Mil riba monticulo den e ultimo dos inning di partido cosnan tabata mustra bon pa Team Kingdom, pero de Bok no tabata den su miho dia y ta duna un triple pa haci e score di 4-7. Durante nan ultimo dos turnonan na bate, e ekipo Oraño ya no tabata forma un menasa pa Twins y asina tambe ta perde nan di tres partido na Arizona.
Diadomingo mainta ainda e ekipo a train, preparando asina pa dialuna sali pa Corea del Sur. Na Seoul nan lo hunga e wega dos wega di fogeo, prome cu nan enfrenta Corea del Sur, dia 7 di Maart den e wega di inauguracion.
fuente: honkbalsite