Team Kingdom di Hulanda, a gana su prome partido den un wega di fogeo riba suela Coreano cu score abulta. Hulanda ta knock out KBO Army, cual ta consisti di hungadonan profesional di Corea como tambe hungadonan di liganan menor, cu ta practica baseball durante nan aña di servicio militar. E line up di e Team Kingdom pa e wega aki, riba papel tabata un di e mihonan, y esaki tabata un realidad, tambe den practica. Hulanda ta gana 11-1.
Manager Hensley Meulens tabata tin su seleccion completo cun’e, cu excepciom di Dashenko Ricardo, cu a bula bek pa Corsou pa entiero di su tata. Despues di entiero e lo reuni bek cu su ekipo. Meulens a kies un line up cu Jurickson Profar den Center Field, Andrelton Simmons den short stop, y Didi Gregorius como bateado designa. E otro short stop di Mayor League, Xander Bogaerts, a cuminsa como tercera base.
Forsa di bateo
Den e prome inning caba, Oranje ta tuma delantera cu 1 careda, ora cu Jonathan Scoop ta conecta un hit den Center Field, pa asina Xander Bogaerts anota e prome careda. Rob Cordemans tabata e picher habrido pa Team Kingdom, den un partido unda cu tur picher lo haya oportunidad pa tira un inning. E prome dos coredonan ta dal un hit y un doblete. Un bon relevo di CF Profar, via segunda base Schoop pa Catcher Shawn Zarraga ta evita cu e Coreanonan ta empata e partido. Pero despues ta bin un fly di sacrificio, unda cu e Coreanonan ta empata e partido toch.
Despues di e prome inning aki, e Coreanonan ta anota solamente tres hit. E bateadonan di KBO Army no a logra yega segunda base mas. En cambio, e bateadonan di Team Kingdom si a sigui ariba bon pia. Randolph Oduber ta score, riba un doblete di Andrelton Simmons haciendo e partido 2-1. Y asina tambe Oranje ta sigui bay dilanti. Den di 5 inning, Curt Smith ta conecta un homerun bon pa dos careda, y asina Oranje ta bay dilanti 5 pa 1. Pero Oranje tabata leu di cla. No solamente e starternan, pero tambe e relevonan tabata den forma optimal.
Victoria amplo
Stijn van der Meer (two-run double), Yurendell de Caster (RBI single), Sharlon Schoop (2 hits, 1 RBI) y Dwayne Kemp ta conecta den e ultimo inning 5 di e 16 hitnan di Team Kingdom. Den e ultimo 3 inningnan, Oranje ta coy e delantera cu score di 11-1 y asina ta gana facilmente di e team cu un dia prome ainda a gana e ekipo di Corea del Sur. Despues di e wega, Hensley Meulens a bisa cu “e ta sumanente contento cu e resultado, pero ta mas felis ainda cu e empeño cu e team a demostra den nan wega”.
Mañan diasabra Team Kingdom lo hunga un otro wega di fogeo den e Gocheok Sky Dome y diadomingo nan ta hunga e ultimo wega di fogeo den antesala di e World Baseball Classic contra di KBO Police.