Ateliers ’89 un bes mas ta trece Aruba, e maestra y e sensacion di moda di aña pasa na San Nicolas, esta señorita Mirte Engelhard, cuminsando dialuna 7 di November pa asina termina diadomingo 4 di December, cerando en grande Aruba Fashion Week 2016!
Ateliers ’89 fundacion ta brinda bo e oportunidad unico aki, di bin traha cu e maestra Hulandes den moda y amplia asina bo vision y creacionnan den moda contemporaneo!
Pa un luna largo lo traha intenso, 4 bes pa siman. Di dialuna pa diahuebs di 6.30 pa 9.30pm. Pa por inscribi porfavor yama awor caba na telefonnan; 5654613 of 5885776. Pero ta mas miho ainda si bo por haci esaki via e-mail na elvis@ateliers’89.com.Tambe bo por pasa personalmente na Dominicanessenstr.34, aki nos semper ta cla pa yuda bo. Na man drechi ariba e crusada di Maria College na Playa. Inscribi awor ya cu cuponan ta limita.
Partisipa y inscribi bo mes pa e workshop aki di Fashion yama “Implosion/Explosion”!
Bo ta loco cu moda of bo tin e ambision di bira diseñador di moda?
Esaki ta bo oportunidad! Inscribi bo mes awor na Ateliers ’89 su workshop di FASHION!
Den e workshop di “Implosion/Explosion”, nos lo bay traha outfitnan den gruponan chikito na unda e accento lo ta riba e forma, volumen y silueta. Nos ta traha cu tur e participantenan na un “Moodboard” na unda despues den gruponan chikito, lo nos traha diferente “show items”. Na banda di e uso di mashin di cose nos lo busca otro formanan pa pone un trahe den otro, pensa akinan na boton, pone hunto, plak y weef. Den e cuatro simannan aki nos ta traha hunto na un coleccion grandi. E workshop lo culmina den un show di moda profesional. Bo tin bo mes un mashin di cose o bo por presta uno, wel trece esaki na Ateliers ’89. Lo bo bin den contacto cu diferente aspectonan di e proceso di diseña, procedura di concepto, e trahamento di moodboards, dibuho di model, schetsmento di coleccion, escohencia di material y naturalmente e presentacion di e coleccion.
Importante ta cu tur hende ta bon bini pa participa, cu o sin experiencia. Tur hende lo wordo yuda y critica igual, segun e nivel cu nan tin. Si ta wordo spera cu bo lo participa intensamente y cu un gran motivacion. Esaki kiermen cu bo mester ta presente fisicamente y participa activamente den e lesnan.
E workshop lo wordo guia pa Mirte Engelhard ken a caba su estudio na 2010 na academia di arte contemporaneo na Artez Arnhem Hulanda. Na e momentonan aki e tin su mes un marca y cas di moda den e “mode kwartier” na Arnhem y tambe bo por encontra su coleccion den diferente tiendanan den cuidadnan na Hulanda.