Diabierna 16 di Juni ultimo, Camara di Comercio y Industria Aruba (KvK) a organisa den su auditorio un workshop caminda a invita diferente stakeholder tanto di sector publico como di e sector priva pa hunto por brainstorm riba e formalisacion di un incubador comercial. Un incubador comercial (business incubator) por lo general ta encera un edificio cu ta brinda e oportunidad caminda diferente empresario chikito of otro persona cu tin idea innovativo pero cu no tin tur e metodonan of recurso pa haci esaki bira un realidad por ubica nan mes cu e fin di haya apoyo y crea negoshinan nobo. E empresario por maneha su negoshi pa e prome 3 aña den e incubador y despues lo tin cu busca un otro luga si e compania sigui crece.
COSME ta un iniciativa funda door di Union Europeo pa brinda apoyo na empresanan chikito y mediano di OCTs (Overseas Countries and Territories) den region Caribense. Pa e workshop aki a invita Sres. John Sandiford y Maarten Hendriks di Founded By All, un empresa incubador di Eindhoven na Hulanda. Nan a bin specialmente pa conta con nan a logra lanta nan incubador Founded By All y haci esaki uno exitoso na Eindhoven. Nan a splica con e idea a cuminsa y tambe e obstaculonan cu nan a encontra na caminda prome cu nan por a yega na unda cu nan ta actualmente. Founded For All ta brinda espacio na starters creativo. Si bo ta cumpli cu e rekisitonan bo por cuminsa bo negoshi den nan edificio y cu esaki bo ta haya apoyo y guia di otro empresarionan cu tambe tin negoshi den e edificio y asina un ta yuda e otro crece hunto. E idea pa e exito di esaki ta a base di e “Triple Helix Model” cu ta describi un colaboracion entre e tres partidonan cu ta sector publico, academico y industrial. A base di e network aki oportunidadnan comercial por wordo facilita den un forma sostenibel.
Invitadonan a haya e oportunidad pa trece dilanti nan puntonan di bista y haci pregunta relata na con por formalisa un incubador comercial na Aruba. Un punto importante pa tur participante ta e necesidad pa promove e aspectonan di colaboracion y mantene asina un bon network pa e incubador.
Un incubador comercial pa Aruba por significa oportunidadnan nobo pa diferente sectornan. Esaki ta crea cuponan di trabou y tambe crea pilarnan economico nobo pa Aruba. Su formalisacion ta rekeri hopi esfuerso di tanto sector comercial y priva.
KvK kier gradici, sra. Esther Pezij-Broeksema y sra. Bianca Peters di Bureau Innovatie, sra. Lucia White di FreeZone Aruba, sra. Sharon Erasmus di Arina, sra. Patricia Blume di Neptune Trading, sra. Maria Dijkhoff-Pita y sra. Louella Croes di DEZHI, sr. Boy Ecury di Ecury Solutions, sr. Dave Martinus di ActionCoach, sr. Greg Wallace representante di The Palm Tours, y sr. Michael Lampe di BEAM pa nan presencia y aporte na e workshop. KvK a wordo representa door di sres. Ernst Mohamed y Kawish Misier di Directiva di KvK y tambe directora sra. Sonja Velthuizen acompaña pa sra. Sue Ellen Farro y sr. Rafeli Croes. Di e forma aki KvK kier mustra di ta para tras di e iniciativa aki y lo kier wak e incubador bira un realidad.
E workshop a bai den bon ambiente y a stipula un siguiente reunion pa asina mantene e animo pa por formalisa e incubador comercial na Aruba.