MONTANA, Merca- Un video estremecedor ta mustra un tata cu su yiu, pega mei mei di un incendio forestal den e parke nacional di Glaciar, Montana, Merca, ta den auto purbando di scapa for di fierno.
E hikernan Justin Bilton y su tata, di 70 aña, mester a huy den auto for di e zona di Lago McDonald, coriendo pa e unico caminda di salida, rondona pa vlam y chispanan ta spart tur caminda.
Mientras nan tabata huy di e situacion, y den un momento, Justin a sigura cu e auto tabata birando mas cayente, y cu e lo por explota. “Papa, nos no por sali”, ta bisa., E grabacion ta caba ora cu dilanti di nan, nan ta haya un palo abao y na candela.
Segun Justin a conta despues, ora cu nan a topa cu e mata, nan mester a bay bek pa e caminda pa e riu, unda cu nan a wordo rescata pa Rangernan den un boto. Nan mester a bandona e vehiculo, y esaki a kima completamente door di e candela.
Segun Yahoo News, e candela cu a cuminsa dia 11 di augustus, causa door di un lamper, ya caba a cubri un territorio di mas di 1600 hectarea.