Mario Soares, ex presidente Portugues di 92 aña a fayece diasabra, despues cu e tabata interna den hospital for di december. E tabata wordo considera como e tata di democracia di Porgutal.
Soares, un socialista tabata Prome Minister di Portugal na diferente ocasion, y entre e 1986 te cu 1996 e tabata presidente di e pais aki.
El a hunga un rol importante den e Revolucion di Clavel na 1974, un golpi militar cu a pone un fin na e dictadura di 48 aña. Cu su partido Socialista el a hiba Portugal na e caminda di democracio, despues di decadanan di dictadura.
Soares a nace dia 7 december 1924, y e ta bin di un famia cu tabata masha contra di e dictadura Portugues. Bou di e dictador Antonio Salazar (1932- 1968), Soares a wordo aresta 12 biaha . E sucesor di Salazar, Marcello Caetano, a forsa Soares pa bay den exilio na 1970.
El a traha como profesor na Paris y el a dedica masha hopi tempo na su aspiracionnan politico. El a establece contactonan cu hopi politiconan influyente di West Europa y na 1973, hunto cu par di amigo na Alemania, e ta lanta su partido socialista. Un multitud di persona a bin ricibi’e na su yegada na Lisboa, caminda el a yega cu trein. Esaki despues di e caida di e dictadura Portugues.