Ultimo diabierna di Oktober ta e fecha escogi pa realisa e prome edicion di ‘T’aki Tin’. E evento ta e union di lo miho cu Aruba tin pa ofrece na su hendenan, pero tambe na nos bishitantenan. T’aki Tin ta trece hunto cuminda, arte y entretenimento. ‘Aki’ ta referi na e espacionan habri di Caya Grandi na Playa cu ta bay wordo transforma den un feria vibrante, yen di luz, color, bon musica y ambiente. Un y tur ta bon bini ya caba for di 6’or di atardi y lo bay te casi mey anochi. Kiermen, tin hopi tempo pa bishita tur stand, wak tur loke tin di wak, purba tur loke tin di purba, topa y combersa.
En conexión cu ‘Eat Local’ month, Hyatt Regency ta bai ta presente cu un Pop Up Restaurant. Es decir cu e anochi aki so tur presente lo tin e oportunidad di come cuminda inspira for di nos cushina local. Tambe lo tin un show di talento cu ta mustra hopi prometedor hunto cu poesia. Museonan den centro di ciudad ta bay habri nan porta pa tur hende por admira nan coleccion. Naturalmente tiendanan ta extende nan orario y bo por probecha pa haci bo compras.
Fanaticonan di Korteweg y Kadushi Festival lo ta contento di sa cu ambos evento tambe ta forma parti di T’aki Tin diabierna awor. Tur e oferta di articulo y artesania local, musica y ambiente lo ta presente pa comparti cu comunidad y turistanan. Pa completa e gran variedad di entretenimento, Aruba Fashion Week tambe t’ey cu un preview di moda, mientras cu pa e amantenan di cerbes craft, a prepara un bon stand. Dal bo bebida friu mientras bo ta wak presentacion en bibo di e tan popular Jeon.
Corda cu tram lo ta funcionando pa keiro bay bin. Ban hunto den famia of cu amigonan, bisti bo miho sonrisa, celebra cu fin di siman a cuminsa y yuda nos bishitantenan conoce nos rubianonan y cultura mas di cerca. Pa mas detaye riba tur loke ‘T’Aki Tin’ tin pa ofrece den su salida y un mapa di full e area, bishita e pagina di Facebook:T’aki Tin.