TAIPEI, Taiwan – Taiwan a prohibi e consumo di carni di cacho y pushi, despues cu e organo legislativo di e isla a aproba diamars un amienda historico di su leynan di proteccion animal.
E agencia Central di Noticia di e isla (CNA), a bisa cu e amienda a mustra e transicion “di un sociedad caminda cu e carni di cacho ta wordo consumi regularmente” na uno cu “hopi hende ta trata cacho y pushi como miembro di nan famia.”
Awo, kende come carni of ta comercia cu carni di cacho of pushi, por ricibi un multa di entre 1640 y 8200 dollar.
E amienda tambe ta prohibi “keiro” e mascota cu un leash lastra pa un auto of brommer y eleva e pena pa crueldad animal.
Taiwan a duplica e plazo maximo di prizon pa crueldad animal na dos aña y a establece un multa di te 65.500 dollar pa cualkier acto cu ta daña deliberadamente na e animalnan y a resulta den mutilacion, insuficiencia organico of morto.
Activistanan na defensa di animal, a presiona e fabor na e amienda despues di un serie di casonan impactante di maltrato animal.
Aña pasa, un video a mustra un grupo di personal militar golpiando un cacho, stranguland’e y tirando e curpa na lama, a provoca protestanan publico. E minister di Defensa a pidi disculpanan publico pa e incidente.
Carni di cacho ta wordo consumi den hopi parti di Asia, incluyendo na China, Filipinas, Korea y Indonesia, segun Humane Society International.
China ta wordo critica pa su festival anual di carni di cacho na Yulin, zuid di China, unda cu 10 mil cacho ta wordo sacrifica y sirbi como cuminda.
Sin embargo, tambe tin un creciente oposicion na China riba consumo di carni di cacho.
Un encuesta di AnimalsAsia na 2015 a mustra cu casi mita di e 3221 persona encuesta, ta kere cu su consumo mester ta ilegal.
Fuente: CNN en Español