Minister di Transporte y Comunicacion, Sr. Chris Romero, a elabora en cuanto e declaracionnan cu Taxi bondnan a haci durante conferencia di prensa den cual nan a indica cu a haci cambionan y a kibra palabracionnan cu tabatin na mesa cu e Minister.
E Minister ta sinti cu tin un mal comprendimento di parti di e bondnan. E ta splica cu locual a ser palabra tabata solamente tocante e prijslijst. Ningun momento a papia di condicion, pero ta aclarea cu condicionnan ta wordo traha a base di loke ley ta permiti. E Minister ta mustra cu si tin condicionnan cu nan lo kier mehora, e ta mas cu dispuesto pa sinta cu nan y combersa riba esey. Pero e Minister ta sigura cu ningun momento el a haci un cambio of duna ordo pa haci cambio riba condicionnan y ta lamenta cu a bay asina leu di yama un conferencia di prensa pa e situacion aki.
Un di e condicionnan ta pa haci e taxinan distinguible pa e turistanan por reconoce cu tal vehiculo ta un taxi y asina kisas tambe combati taxi pirata. Minister Romero a mustra cu cualkier condicion cu taxistanan kier trece padilanti, e Minister ta dispuesto pa sinta na mesa y papia tocante nan.
Y asina tambe, diamars atardi 3 or, taxistanan y minister Romero a sinta na mesa, y dialoga ariba e puntonan di friccion entre ambos partido. Na final, a bin resulta cu tur cos tabata un mal comprondemento cu a keda aclaria entre e dos partidonan.