Ora pueblo a scoge pa AVP na 2009, e tabata tin hopi motibo. Un di e motibonan tabata cu desempleo na Aruba a subi te yega casi 11% nacional entre 2001 y 2009. Bou hubentud e tabata alrededor di 30%. Awe e tasa di desempleo na Aruba ta rond di 5%. E nivel mas abou den decadanan. Pero ainda tin hende ta busca trabou. Pesey tanten cu tin hende ta busca trabou, AVP lo sigui ehecuta proyectonan publico y atrae inversionnan pa crea trabou. Crea trabou tabata y ta keda un di e puntonan principal di maneho di AVP. Tur e inversionnan den infrastructura di Aruba, den renobacion di scolnan, den renobacion di barionan, den construccion di un hospital nobo, den renobacion di wafnan y di aeropuerto, di e construccion di e Green Corridor y e Avenida Watty Vos, te na e ponemento di klinkers den barionan, tur tabata tin dos meta principal: 1. Renoba y mehora e infrastructura. 2. Crea trabou! Un di e metanan tras di e reapertura di e refineria, ta tambe e cresion di cuponan di trabou bon paga den sector di industria. Pesey crea trabou tabata y lo sigui ta un di e metanan principal di e maneho di AVP. E resultado di e maneho aki ta demostra cu el a duna efecto tambe. Desempleo na Aruba a baha for di 11% pa 5 %. Y na mes un momento nos pais a haya un infrastructura fisico sumamente bon cu lo carga nos economia y crea oportunidadnan nobo pa e benidero 25 aña.
CAMBIO
Inversionnan di tanto sector publico (gobierno), como di sector priva bou di maneho di AVP, a haci cu a crea cuponan di trabou nobo. Den sectornan existente manera turismo. Pero tambe den actividadnan economico nobo. Esey ta splica en parti e crecemento economico for di 2010. Un consecuencia di e inversionnan aki ta cu mas hende a bolbe haya trabou. Den e dos graficonan akibou por wak con desempleo a crece bou di gobierno di MEP y con ela baha bou di gobierno di AVP. E cifranan di desempleo riba cua e graficonan aki ta traha, ta di Banco Central di Aruba.
RENOBACION
E necesidad pa renoba leynan antigua y formanan di traha bieu na Aruba, ta pasobra economia mundial ta cambia, competencia rond di mundo ta bira mas fuerte y nos hobennan tin interes y capacidad pa haci otro tiponan di trabou cu prome aya. Pesey den e maneho di renobacion di nos economia, a cuminsa crea areanan economico nobo, cu lo habri posibilidadnan pa trabou pa hobennan cu estudio y interesnan nobo. Pero tambe lo crea trabou pa hende hoben y esnan cu hopi cu kier haci trabounan diferente. Gobierno di AVP a crea cuatro area economico nobo cu lo habri cuponan di trabou nobo den e añanan cu ta bin. E cantidad di cupo di trabou cu a crea den ultimo añanan ta demostra cu e maneho a duna bon resultado. Tin cu sigui cu e maneho aki di crea trabou pa nos hendenan!