Recientemente Minister Hooyboer-Winklaar a tuma un decision encuanto mudamento di 2 scol relaciona cu e situacion infrastructural di e edificionan. Actualmente tin un total di 84 edificio cu ta wordo uza pa scol, mayoria di nan ta entre 40 pa 60 aña bieu y masha poco di nan a ricibi un renobacion amplio. Mas of menos 70% di e 84 edificionan mester di un renobacion grandi. E suma pronostica pa cubri tur e gastonan di renobacion necesario ta den careda di Afl. 250 miyon florin.
Algun luna pasa, Minister Hooyboer-Winklaar a anuncia cu lo sondea e posibilidad pa haci esaki via un tipo di PPP, pero cu lo wordo carga mas hopi posibel door di fondonan den presupuesto existente. Sinembargo, ora ta trata edificionan asina bieu tin situacionnan mas urgente cu por surgi. Esaki ta e caso actual di Juliana School MAVO y Imelda Kleuterschool.
“Mi maneho riba e situacion di edificionan di scol ta cu na momento cu nos ricibi cualkier indicacion cu e scol no por keda den nan propio edificio debi na cualkier situacion di infrastructura mi ta tuma e decision di biaha pa re aloca e scol pa sigura cu ni studiante y ni maestro lo core peliger”, Minister Hooyboer-Winklaar a splica.
Ambos di e scolnan aki ta riba lista pa renoba, hunto cu varios otro scol, pero durante luna di juli ultimo a ricibi un peticion di e scol pa laga DOW haci un opname completo. “Nos a ricibi e conseho cu tur detaye di e situacion actual di e scol y e plan pa drecha loke mester wordo drecha. Aunke no a duna conseho pa saca e scol inmediatamente, mi a tuma e decision pa saca e scol mas pronto cu ta posibel pa ta mas safe pa tur esunnan di e scol,” Minister Hooyboer-Winklaar a splica.
“Hunto cu DOW nos ta trahando pa haya e sumanan exacto pa nos por renoba e siguiente 6 scolnan. 6 scol cu no por warda mas pa nos termina e fase di preparacion pa e proyecto PPP cual nos ta premira cu lo bay den ehecucion den 2018. Asina mi tin e informacion aki, nos lo bay Parlamento pa pidi e suma necesario. Ta premira cu ta trata aki di 15 pa 20 miyon”, e mandatario ta sigui elabora.
Un punto hopi importante cu ta trece retraso den algun renobacion ta pa e motibo cu cierto di nan ta wordo menciona riba lista di monumento. Akinan ta haciendo algun investigacion cu lo bay mantene esaki of si ta bay haci e peticion pa ningun scol no ta riba lista di monumento pa asina facilita e proceso di renobacion. Mas den e dia nan nos dilanti lo ta duna mas detaye di cua ta e otro scolnan cu lo ta yegando na turno pa un renobacion completo.