CARTAGENA, Colombia – Gran indignacion a tuma luga depsues cu un video cu a wordo comparti riba YouTube, unda cu por a observa un grupo di enfermera bailando mientras cu nan tabata prepara un pashent, kende tabata drumi y fo’i tino, pa un intervencion kirurgico, segun e website Caracol.com.co a informa.
Durante e video, cu a bira un tendencia riba rednan social, por a mira momento cu e enfermeranan a haci diferente paso di baile manera cu nan tabata den pleno carnaval, hasta a logra mira e pashent sunu y boca abao.
E video di Youtube a genera controversia y gran escandalo riba rednan social, ya cu hopi usuario a expresa su rechaso definiendo e actuacion aki como un falta di etica profesional.
E hecho a tuma luga den e clinica Santa Cruz de Bocagrande di e ciudad di Cartagena, na Colombia y su representantenan a lamenta profundamente e penoso hecho y a informa cu nan a kita e cinco trahadonan pa e comportacion aki.
Segun e centro medico, esnan involucra a viola tur e protocolnan cu mester sigui den e casonan aki y pa tal motibo a dicidi kitanan di inmediato. “E respet pa e dignidad di cada un di e pashentnan ta primordial den nos institucion, di loke nos ta rechasa y lamenta profundamente e comportacion inapropia di esnan cu ta eherce profesion y ocupacionnan den e area di salud, evidenciando den e video graba den un di e cambernan di operacion di nos institucion,” e hospital a indica den un comunicado, segun e website di Caracol.com.co a informa.
E clinica a responsabilisa e enfermera y dokternan di a atenta contra e dignidad di e pashent “violando protocol, politica, principio y valornan institucional, enfoca den e calidad y humanisacion di e servicio.” E escandalo riba e video – cu a wordo exponi riba rednan social – a escala di tal punto cu e Departamento Administrativo Distrital di Salud (Dadis) a resolve na bishita e centro medico pa evalua e condicionnan cu nan ta traha eynan.
“Ta prome biaha den shete aña di bon servicio, cu nos ta biba un situacion manera esaki y nos a tuma medida y corectivonan necesario pa e actonan aki asina reprochabel no ripiti,” Clinica Santa Cruz de Bocagrande a sostene. “E entidad lo sigui traha pa garantisa e pashentnan un trato digno, procurando cu cada un di e profesionalnan eherce su labor enmarca riba e valornan institucional, protocol y proceso,” e documento a conclui.
Fuente: http://www.ecuavisa.com