SANTA CRUZ, Bolivia – Servicio Departamental di Salud di Santa Cruz (SEDES), Bolivia, a registra diaranson e prome morto pa e sindrome di Guillain-Barre, atribui na e virus di Zika, segun e director di e entidad aki, Joaquin Monasterio a informa den un rueda di prensa.
E victima tabata un dama di 56 aña kende a muri den Hospital San Juan de Dios di Santa Cruz, debi na un paralisis respiratorio.
“E pashent aki a wordo interna pa insuficiencia respiratorio y tabata tin dos paro respiratorio y el a fayece. Posteriormente a haci analisis den su urina y a duna positivo pa zika, ta pesey nos por confirma e prome fayecimento pa e sindrome Guillain-Barre, atribui na zika,” Monasterio a splica, cita pa e Agencia Boliviano di Informacion, ABI.
Na Bolivia a presenta 30 caso di e sindrome di Guillain-Barre, desde 2 aña pasa: 15 caso na 2014, 9 na 2015 y 6 na 2016, segun SEDES a splica riba su pagina di Facebook, pero no a establece si nan tabata conecta cu zika.
E prome caso di infeccion di origen local pa e virus di Zika na Bolivia, a reporta na Januari di 2016, segun OMS. A presenta un hende muhe na estado di 32 aña di e departamento di Santa Cruz.
“Te cu e fecha a reporta 15 caso di microcefalia, di cual cinco tabata atribui na e virus di Zika, cinco ta den estudio pa confirma su relacion cu e virus y e otro cinco casonan a wordo descarta pasobra microcefalia ta debe na otro causanan,” SEDES a skirbi riba Facebook.
Un síndrome mortal
Na principio di Februari, e Organisacion Mundial di Salud a confirma cu e virus di Zika por causa microcefalia cerca babynan recien naci y sindrome di Guillain-Barre cerca otro pashent, un enfermedad autoinmune cu ta ocasiona debilidad muscular of paralisis.
E sindrome por afecta e nervionan cu ta transmiti e sensacionnan di dolor, termico y tactil, ademas di afecta e movimentonan muscular. E enfermedad aki por ataca personanan di tur edad pero ta mas frecuente den adulto y den pashentnan di sexo masculino, segun OMS.
“E sindrome di Guillain-Barre por ta mortal. Personanan cu sindrome di Guillain-Barre, mester di tratamento, tin biaha den cuidadonan intensivo y siguimento. E tratamento ta consisti den medidanan di apoyo y inmunoterapia,” OMS ta agrega, aunke e ta agrega tambe cu hasta e casonan mas grave di e sindrome aki por wordo cura.
Autoridadnan di Bolivia ta delanta campañanan di prevencion pa elimina criaderonan di sangura Aedes Aegypti – cu Zika ta produci – den hogarnan y asina mes preveni embarasonan den zonanan di mayor incidencia di e insecto aki, segun ABI ta informa.
Fuente: CNN en Español