CARACAS, Venezuela – E Sala di Casacion Penal di e Tribunal Supremo di Husticia (TSJ) a ratifica pa di dos biaha e condena di e lider opositor Leopoldo Lopez di 13 aña, 9 luna y 7 dia y esun di e studiante Christian Holdack pa mas di 10 aña, despues di a declara inadmisibel un recurso di apelacion di parti di e defensa.
“Ta declara inadmisibel e recurso di casacion, ya nos tin e posibilidad di purba accionnan internacional,” e abogado, Juan Carlos Gutierrez a detaya, kende ademas a splica cu, cu e decision aki di TSJ, “e caso di Lopez lo keda cera” na Venezuela.
Lopez y Holdack a wordo condena pa husticia Venezolano pa e protestanan antigubernamental contra Nicolas Maduro na 2014, cu a laga por lo menos 43 morto.
E ratificacion di e condena contra Lopez a tuma luga despues cu su casa, Liliana Tintori, a reuni diaranson cu e presidente di Merca, Donald Trump, e vicepresidente di e nacion aki, Mike Pence y e senador Marco Rubio na Cas Blanco.
Dia 18 di Februari, Lopez ta cumpli tres aña cu nan a priva su libertad den e prizon di Ramo Verde; pa e dia aki e lider di Voluntad Popular a convoca un mobilisacion na Caracas den defensa di democracia.
Fuente: NTN24