MIAMI, Merca- E grupo ‘Venezolanos Perseguidos Políticos en el Exilio (Veppex)’ a pidi pa Merca investiga cuentanan bancario di e companianan Venezolano na Merca, cu ta haci negoshi cu “institucionnan corupto”, manera Petróleos de Venezuela (PDVSA).
Den un carta dirigi na e secretario di Tesoro di Merca, Steven Mnuchin, Veppex a solicita pa investiga e “cuentanan bancario di companianan cu ta pertenece na Venezolanonan cu “a establece relacionnan comercial y a haci negoshi cu institucionnan na Venezuela”, specialmente e companianan estatal manera PDVSA y Siderúrgica del Orinoco.
E ta solicita tambe pa revisa e cuentanan bancario di esunnan cu a “haya divisa pa e compra di ekiponan electrico of di alimento y remedi”, tur esunnan cu, segun Veppex, “hopi vulnerabel pa corrupcion”, den e pais Suramericano.
Veppex, cu sede na Miami, Florida, a resalta e importancia di e “capital” den teritorio Mericano “procedente di corupcion na Venezuela wordo identifica” y “someti na leynan” di e pais.
Dialuna ultimo, Departamento di Tesoro a impone sancionnan economico contra cuater persona di cargo halto di e gobierno di Maduro, kende nan activonan na Merca a wordo gefreeze.
E nombernan di Américo Alex Mata García (Mata), Willian Antonio Contreras, Nelson Reinaldo Lepaje Salazar y Carlos Alberto Rotondaro Cova, a suma na e lista largo di Venezolanonan sanciona pa e Departamento di Tesoro Mericano.
Fuente: https://www.lapatilla.com