Zomer ta den cuminsa den e hemisferio Sur. Paisnan tropical ya ta spera e plaga di sangura. Miles di miyones lo nace den e proximo simannan y lo bay converti den portadornan di malesa manera Zika, dengue of keintura geel.
Sanguranan ta e principal responsabelnan di transmision di malesanan den un bon parti di Sur America, Africa y Asia. Cientificonan ainda no a haya un metodo eficas pa combati nan… te awor.
Bo por mata nan cu un insecticida, pero nan ta reproduci asina lihe y cu asina facilidad cu su cantidad no ta reduci. Ta precisamente su ciclo di reproduccion, su arma mas potente, unda cu ta residi tambe su mayor debilidad.
E firma Britanico Oxitec ta dispone na libera miyones di sangura mutante na Brasil pa combati enfermedadnan manera e teribel Zika, causante cu miles di mucha ta naciendo cu microcefalia na Brasil y otro paisnan Sur Americano.
E sanguranan mutante aki, tur di nan macho, a wordo modifica geneticamente pa nan cria muri ora cu nan nace. E obhetivo ta pa nan copula cu e sanguranan hembra di Aedes Aegypti, cu ta transmiti Zika y su gennan modifica lo haci cu su cria muri poco despues cu nan nace. No solamente esey, sino cu e mesun sanguranan mutante tambe lo fayece prematuramente despues di cumpli cu su mision. Esaki ta un di nan:
Oxitec a ehecuta cinco prueba riba veld desde 2011 pa 2014 den paisnan manera Panama, islanan Caiman y den Brasil mes y e poblacion di e sanguranan Aedes Aegypti a descende den e zonanan aki cu un 90%.
Den su criadero di sangura di Piracicaba, na Sao Paulo, e compania Britanico por produci 60 miyon di sangura modifica geneticamente pa siman. E propio ciudad di Piracicaba, di mas di 350 mil habitante, lo bay procede na laga los 10 miyon di e sanguranan mutante aki cada siman. Pero pa por ehecuta e medida di prevencion na nivel nacional, Oxitec tin mester un permiso sanitario cu ya ta den proceso y cu ta wordo spera pa wordo haya na 2017.
Fuente: Computer Hoy