WASHINGTON, Merca – E empresarionan Venezolano Roberto Rincon y Abraham Jose Shiera a wordo poni den libertad provisional den espera di wordo husga na Januari proximo pa e supuesto pago di 1000 miyon di dollar na soborno na cinco miembro di directiva di e petrolera estatal Petroleos de Venezuela (PDVSA).
Fuentenan hudicial a indica diahuebs na Efe cu un hues di e Corte di Districto Sur di Texas, cu sede na Houston, a ordena e ponemento den libertad di Rincon na principio di e mesun luna aki y esun di Shiera na Mei ultimo, despues cu ambos a permanece den prizon provisional durante lunanan tras su aresto na December di 2015.
Gobierno di Merca ta acusa Rincon y Shiera di a paga entre 2009 y 2014 mil miyon di dollar na miembronan di directiva di e empresa petrolero di Venezuela pa supuestamente obtene contractonan lucrativo cu esnan cu ta beneficia na su empresanan energetico, hopi di nan radica riba tera Mericano.
E escrito di acusacion di e Ehecutivo di Merca, a menciona na cinco ehecutivo di PDVSA, na esnan cu no ta wordo identifica pa su nomber y cu supuestamente a ricibi soborno den forma di placa y regalo, entre loke a inclui cuminda, biahe, whisky y hasta un anochi den un luhoso hotel di Miami Beach (Florida).
Pa e acusacionnan aki e Venezolanonan lo bay ricibi sentencia dia 6 di Januari di 2017, segun un orden hudicial cu a yega na Efe.
Mientras tanto, Rincon y Shiera lo permanece den libertad cu e condicion di paga cinco miyon y un miyon di dollar, respectivamente, si nan no cumpli nan obligacion di presenta den e Corte di Districto Sur di Texas pa ricibi e sentencia of aparece dilanti un citacion, segun e dos ordennan di libertad provisional.
Durante nan periodo den libertad provisional, e dos acusadonan lo permanece deteni den nan cas bao di supervision y cu e imposibilidad di sali cu excepcion pa necesidad medico of religioso y pa asisti na citanan cu nan abogado of otro funcionarionan hudicial, segun e dos ordennan ta establece.
Ademas, e dos acusadonan no lo por pone den contacto entre nan ni purba di influi den posibel testigonan di e proceso.
E investigacion di Merca riba e dos acusadonan a cubri 730 cuenta bancario, hopi di nan na Suisa y por lo menos un na Panama, segun e documentonan hudicial.
Di e cuentanan bancario aki, Husticia Mericano ta vincula 108 na Rincon, cu tabata tin un relacion di “amistad” cu Hugo Carvajal, exdirector di inteligencia militar Venezolano, kende Merca ta reclama pa delitonan di narcotrafico relaciona cu Forsanan Arma Revolucionario di Colombia (FARC) y cu a wordo deteni na 2014 na Aruba.
E ora ey, autoridadnan Hulandes a pone Carvajal den libertad, homber di confiansa di e fayecido presidente Hugo Chavez y cu por bolbe rapidamente na Venezuela, unda cu el a ricibi e apoyo di Gobierno di Nicolas Maduro, cu a cualifica e incidente di e “secuestro.”
E investigacion contra Rincon y Shiera, devela na December pasa, a confirma cu e empresa estatal Petroleos de Venezuela, ta un di e obhetivonan di e fiscalnan di Merca, cu ta trata di berigua si e Gobierno di Venezuela a uza e petrolera pa laba placa procedente di narcotrafico, segun The Wall Street Journal na October di 2015.
Fuente: El Universal