SEOUL, Zuid Korea – Un hues Sur Koreano a interoga diahuebs e lider di Samsung Group, Jay Y. Lee, y un otro ehecutivo den un audiencia cu portanan cera pa dicidi si nan mester wordo aresta pa nan papel den un escandalo di corupcion cu a involucra e presidente Park Guen-hye.
Decenas di manifestante rodea pa polis antidisturbio a ricibi Lee, di 48 aña, kende tabata tin un bachi scur bisti y un dashi blauw marino na su yegada na Corte di e Districto Central di Seoul pa asisti na e audiencia.
E oficina di fiscal special di Zuid Korea a concentra nan investigacion riba e relacion di Samsung Group cu Park, kende a wordo someti na un huicio politico pa Parlamento na December y a wordo despoha di su podernan mientras un tribunal constitucional ta dicidi si lo ratifica su impugnacion.
Fiscalnan ta acusa Lee den su capacidad di hefe di e mayor conglomerado di Zuid Koreea, di entrega 43 mil miyon di won (37.7 miyon di dollar) na un empresa y na organisacionnan apoya pa Choi Soon-sil, un amiga di Park, a cambio di e respaldo na un fusion di dos compania di Samsung na 2015.
E placa a inclui e patrocinio di Samsung na e carera ecuestre di e yiu muhe di Choi, kende ta deteni na Dinamarca riba solicitud di autoridadnan Sur Koreano.
Park, Lee, Choi y Samsung Group a nenga cualkier ilicito.
Fiscalnan tambe a busca un orden di aresto contra e presidente di Samsung Electronics Co Ltd. Park Sang-jin, kende tambe ta lidera e federacion ecuestre Koreano y a yega na e audiencia despues di Lee.
Ningun di e hombernan a responde na e preguntanan di periodistanan.
Ta di dos biaha den un luna cu e oficina di fiscal special ta busca un orden di aresto contra Lee.
E mesun corte di Seoul a rechasa su prome solicitud na Januari, pero un vocero di e oficina di fiscal special a bisa diaranson cu dede e tempo ey nan a amplia e cargonan contra di Lee pa inclui pa encubri ganashinan door di actividadnan criminal, como tambe soborno, malversaion, activonan scondi den exterior y falso testimonio.
Fuente: www.elsoldemexico.com.mx (El Sol de Mexico)