INGLATERA – Un grupo di trahado cu ta labora den un puerto Ingles a haya un bom Aleman di Segunda Guera Mundial sin explota. E artefacto tabata contene 290 liber di explosivo.
Afortunadamente, autoridadnan por a lastra esaki cuidadosamente pafo di e waf y a hib’e den awa habri caminda el a wordo detona.
Un chubato a haya e bom den fondo di e waf di Portsmouth diaranson mainta. E waf ta den proceso di un actualisacion largo y costoso. Y mientras e chubato (heavy machine) tabata coba den e klei di e waf, e bom a keda atrapa den e boca di esaki.
“E bombnan aki ta sigui ta peligroso apesar di tin varios decada di antiguedad y ta sinta den fondo di lama durante asina hopi tempo,” capitan Roger Readwin di e Armada Real a bisa.
E bom SC250 di fabricacion Aleman, a wordo uza den Segunda Guera Mundial, specialmente den e London Blitz. E ta pisa 500 liber.
E trahadonan rapidamente a blokia e waf. E ekipo di buceo di e Armada y expertonan den bom a planta e bom den fondo di lama y a uza carganan explosivo pa detona e dispositivo riba un distancia.
Esaki a explota, lansando e aire den un fontein di awa salo y huma.
Fuente: CNN en Español