MONTCLAIR, California – E Asociacion Inland Valley Humane Society & SPCA, a informa den un comunicado cu a haya por lo menos dos mil animal, mita di nan morto, den un local comercial cerca di Los Angeles, Merca.
Polis di Montclair a interveni na e luga, despues cu nan a presenta un inspeccion pa e violacion di e codigo di edificionan industrial, na unda cu “nan a scucha zonido di animal y di biaha a sinti e holo di descomposicion,” segun John Minook, vocero di polis di e localidad, a bisa e agencia di noticia AFP.
“Tabata tin haula cu bestia morto, sin ventilacion, animalnan bibando den sushi y cadaver di otro animal, tabata tin puyito, djaca, un camaleon, colebra,” Minook a bisa.
Den e bodega nan a haya animalnan exotico manera lora, papagayo y hasta pisca, den “condicionnan espantoso,” sin alimento, ni awa, Inland Valley Humane Society a indica den su comunicado.
“Ta pio di loke mi a mira den mi nuebe aña cu e asociacion,” Silvia Lemos, empleado di Inland Valley Humane Society, a aforma na e cadena ABC.
Fuente: www.ntn24.com