Ta di suma importancia pa inscribi pa camber na tempo si kier studia na Utrecht

0
RBC Juli 2018
Funmiles-2018

DEN HAAG –Tur aña Arubahuis ta ricibi un cantidad grandi di studiante cu ta bin Hulanda pa sigui cu nan estudio na un nivel mas halto. Un di e aspectonan crucial den e preparacionan di e hobenan aki na caminda pa Hulanda ta esun di buscamento di vivienda. Sra. Lourdes Bramble-Tromp, mentor di entre otro e ciudad Utrecht kier a pone enfasis ariba e importancia pa studiantenan cu tin pensa di bin studia na e ciudad aki pa cuminsa busca camber na tempo.

Utrecht ta un di e cuidadnan di Hulanda cu conoce un scarsedad enorme di camber pa studiante, mientras cu e interes bou di studiantenan pa bin studia na Utrecht ta hopi grandi. Pues ta esencial pa inscribi bo mes na tempo via un di e websites di organisacionnan di vivienda. Asina bo ta core menos riesgo cu na comienso di bo estudio bo no tin camber.

Sra. Lourdes Bramble ta sigui splica cu studiantenan por haci uso di diferente manera pa yega na un camber den Utrecht. Por ehempel via organisacion di maneho di camber pa studiante (SSHU-Stichting Studenten Huisvesting Utrecht): www.sshxl.nl. Despues di inscribi bo mes y paga un suma di inscripcion, bo por cuminsa reacciona ariba camber cu ta wordo ofreci. E problema ta cu pa haya camber via SSHU e studiante mester ‘hospiteer’. Esey kiermen cu bo ta wordo invita pa bin wak bo camber y sera conoci cu e otro habitantenan y cu nan ta dicidi si bo ta haya e camber si of no. Ademas bo tin cu ta inscribi 1 aña promer cu bo wordo invita. Ta pesey ta importante pa inscribi bo mes mas pronto cu ta posibel na e website aki.

Otro opcion ta camber ofreci door di personanan priva. Hopi habitante di Utrecht ta ofrece cambernan via websites: www.kamernet.nl; www.kamers.nl; www.rooming.nl; www.huurexpert.nl. Mayoria di biaha bo mester paga un suma pa bo por subi un de e websitenan aki y asina reacciona riba e cambernan cu ta wordo ofreci.
Tambe via facebook tin posibilidad manera riba pagina “zoekt kamer in Utrecht” y “Kamer in Utrecht” bo por logra haya camber.

Via makelaars tambe bo por purba bo suerte: www.pararius.nl; www.domstadmakelaars.nl; [email protected]; [email protected]; Esakinan ta opcionan hopi caro. Bo mester paga e makelaar pa su trabao y un borg cu ta wordo stipula a base di 1 of 2 luna extra di huur.

Hopi biaha ta mas facil pa haya camber den vecindario di Utrecht por ehempel na Houten, Zeist, de Bilt, Nieuwegein, Ijsselstein, Maarssen y Amersfoort via personanan priva of via makelaars.

Sra. Lourdes Bramble un biaha mas ta enfatisa cu si bo tin pensa di bin studia na Utrecht inscribi bo mes na tempo y keda controla bo inscripcion regularmente. Pa mas informacion por tuma contacto cu sra. Bramble:
Mobiel y Whatsapp: +31 (0) 6525 46442
Email: [email protected]

Potret ta cortesia di Cas di Aruba.

 

Comments

comments

C: Heineken
new india
dvg