TECNOLOGIA
BRATISLAVA, Slovakia- E compania di siguridad informatico ESET diahuebs a anuncia den un comunicado di prensa e descubrimento di un virus peligroso virus pa Android cu ta capaz di administra dispositivonan infecta a traves di Telegram.
E desaroyadornan di e Troyan HeroRat ta bende esaki como un servicio na escala internacional pa $25, 50 of $100 (dollar), dependiendo di e nivel di ‘hacking’ di telefon. E codigo fuente di e virus ta costa $650 (dollar)
E ‘malware’ ta haya su victimanan a traves di tiendanan no oficial pa aplicacionnan di Android, rednan social y aplicacionnan di manda mensahe. Piratanan informatico ta incorpora e programa maligno den e aplicacionnan cu ta ofrece usuarionan manera bitcoin como bonus, data gratis of e aumento di siguidonan riba rednan social.
Unabes e usuario instala e aplicacion infecta, ta aparece un window cu ta informa over di un fout y e programa ta disimula su autoeliminacion. Sin embargo, a pesar di cu e icon di e aplicacion ta disparce, e troyan lo sigui funciona den scondi den e telefon. Esaki ta permiti e operadornan di HeroRat di administra terminalnan infecta a trabes di un ‘bot’ den Telegram.
E troyan ta permiti di intercepta y manda mensahe, horta contactonan, haci yamadanan, graba audio, haci screenshot, identifica e ubicación di e dispositivo y cambia e settingsnan.
Desde ESET nan ta informa cu e malware ‘no a wordo detecta den Google Play” y mayoria di e infeccionnan cu e virus a word descubri na Iran.