PARIS, Francia – Ningun pais di mundo ta cerca di alcansa e metanan di Nacionnan Uni di eradica tuberculosis pa 2030 y hopi poco di impedi contagionan nobo cu e virus di AIDS (HIV), segun un estudio riba salud mundial.
Menos di 5% di e paisnan lo alcansa pa e fecha aki e obhetivonan di reduccion di suicidio, morto den accidente di trafico y obesidad infantil y solamente 7% lo por elimina infeccionnan nobo cu HIV, segun e estudio publica den e revista The Lancet.
Encuanto Tuberculosis, ningun pais ta cerca di un eradicacion di infeccionnan nobo, segun e agencia di noticia AFP.
En cambio, mas di 60% di e paisnan evalua por alcansa e obhetivonan di reduccion di mortalidad infantil, neonatal y materno y di eliminacion di malaria.
Den su conhunto, solamente 20% di e 37 metanan di salud fiha den e marco di Obhetivonan di Desaroyo Sostenibel di Nacionnan Uni, adopta na 2015 ta susceptibel di cumpli, segun e autornan.
Esakinan ta destaca un “considerabel desigualdad” di e proyeccionnan pa 2030: e paisnan cu ingresonan eleva lo alcansa 38% di e metanan y esunnan di ingreso abao 3%.
Riba e base di e tendencianan registra, Kazachstan, Timor Oriental, Angola, Nigeria y Swaziland lo bay tin e avansenan mas notabel na nivel mundial, segun e autornan, cu ta cita entre nan logronan, un reduccion di mortalidad infantil, un miho acceso na cuidado, na planificacion familiar y e presencia di personal cualifica pa parto.
Otro paisnan a registra retroceso, manera obesidad infantil y abuso di alcohol, entre nan Sri Lanka, Venezuela, Serbia y Ucrania.
E ekipo a establece ademas un clasificacion di paisnan en base na un indice global di e obhetivonan vincula cu salud.
Singapore, Islandia y Suecia ta figura na top di e lista aki di 188 pais, cu ta cera cu Afganistan. Spaña ta figura riba e posicion 23, cu indicenan mediocre den abuso di alcohol, tabaco y obesidad infantil – sigui pa Merca, cual mayor problemanan ta suicidio, agresionnan sexual na menor, abuso di alcohol y homicidio.
Costa Rica (posicion 36) y Cuba (38) ta e prome paisnan Latino Americano di e lista, aunke e prome ta suspende claramente den abusonan sexual di menor y e di dos, su punto mas debil ta nacimento for di mamanan adolescente.
E ultimo tambe ta e principal problema di Uruguay (posicion 45), Argentina (59), Peru (62), Nicaragua (63), Ecuador (79) y Bolivia (112).
Homicidio ta e principal problema na Mexico (48), Colombia (51), Brasil (67), El Salvador (75) y Venezuela (99).
Chile (61) en cambio tin como problema specialmente obesidad infantil.
Honduras, riba e posicion 113, ta e pais Latino Americano pio clasifica, cu resultadonan mediocre vooral riba homicidio, mamanan soltera y riba e registro di certificadonan di difuncion.
E publicacion di e estudio, financia pa e fundacion Bill & Melinda Gates, ta coincidi cu e celebracion di e Asamblea General di Nacionnan Uni na New York.
Fuente: www.eluniversal.com