HULANDA – Un alcoholico Hulandes di largo duracion a dicidi di pone fin na su bida e aña aki cu un inyeccion fatal, sigurando cu ya e no ta capas di bay padilanti, su ruman homber a splica den un conmovedor homenahe.
Mark Langedijk tabata tin 41 aña y tabata tata di dos yiu ora cu el a yega na e conclusion cu e unico solucion pa caba cu su dolor y su sufrimento tabata eutanasia, cu a tuma luga e verano aki den cas di su mayornan, na Hulanda.
“Mi ruman homber chikito ta morto,” Marcel Langedijk a skirbi, kende ta un periodista freelancer, den un articulo pa e revista Hulandes Linda, publica sima pasa.
“E tabata den su cabes. E tabata su problema. Kico e problema tabata, ningun hende realmente por imagina,” el a agrega, reveland cu su ruman homber a wordo asisti na 21 sesion di rehabilitacion den e ultimo ocho añanan y cu tabata tin apoyo di su famia, cu e tabata kier. “Pa ora cu mark a realisa cu e tabata tin mester di ayudo, cu e tabata tin mester di papia cu un hende, ya tabata demasiado laat. Pa e ora ey, e alcohol tabata tin’e gara y no tabata lag’e scapa.”
Langedijk a fiha pa su morto tabata dia 14 di Juli – “un bunita dia pa muri” y a pasa su ultimo oranan hunto cu su famia den e hofi di su mayornan, comiendo snacksnan di ham y keshi, sopi di balchi y humando.
Un dokter autorisa a acudi despues pa administr’e e tres inyeccionnan cu a mat’e.
Contacta pa AFP, e publicista di Langedijk a bisa cu e “reaccion internacional” na su articulo tabata “abrumador y bastante inespera” y cu esaki “el a sinti cu e mester a bisa tur cos loke e mester a bisa na e momento ey” mientras cu e ta skirbi un buki riba e experiencia di su famia.
Hulanda y su pais bisiña Belgica, a converti den e prome paisnan di mundo den legalisa eutanasia na 2002. Esaki ta tuma luga den condicionnan hopi estricto y solamente despues cu un minimo di dos dokter a certifica cu no ta existi ningun otro solucion rasonabel pa e pashent.
Aña pasa a sosode 5516 caso di eutanasia den e pais, es decir 3.9% di tur morto registra.
Mas di 70% di esnan cu ta opta pa stop di biba, tabata sufri di cancer. Un 2.9% tabata padece demencia of enfermedadnan psikiatrico, incluyendo algun cu ta hiba hopi tempo luchando contra e dependencia di alcohol.
Fuente: NTN24