DEN HAAG – E grupo di studiante cu ta studiando na Leiden a expresa di ta hopi gradecido na Minister Plenipotenciario Juan David Yrausquin pa scucha loke nan ta pasando den dje como studiante Arubiano na Hulanda.
Maske cu no tin hopi studiante na Leiden, asina mes hopi a bin pa papia cu e mandatario. Otro studiantenan cu ta studia na Leiden, pero ta biba na Den Haag of na Rotterdam a scoge pa asisti na un di e encuentronan aki cu lo tuma lugar otro siman diamars 18 di April na Den Haag y den luna di Mei na Rotterdam.
Mescos cu tabata e caso na e encuentronan anterior Minister Yrausquin a tuma tempo pa a sinta papia y scucha loke e studiantenan tin di bisa riba nan bida como studiante. Hopi topico a keda trata di cual Minister Yrausquin lo bay pone nan den un plan di accion pa brinda mas sosten na nos studiantenan.
Durante di e encuentro aki algun studiante a bay live via di Facebook pa conta riba nan experiencia como studiante na Hulanda y special tocante di e ciudad unda nan ta studia. Nan a duna hopi tips na e muchanan cu ta preparando pa e aña aki bin Hulanda pa sigui un estudio avansa. Un bunita iniciativa di e studiantenan mes y esaki sigur lo yuda e muchanan aun mas riba nan preparacionnan pa nan bida como studiante na Hulanda.
Na final e studiantenan a expresa nan satisfaccion riba e iniciativa di e minister pa e anochi aki y tambe nan a gradici e mandatario pa e invitacion.