DEN HAAG, Hulanda – Un delegacion di Gabinete di Minister Plenipotenciario, encabesa pa studiantenan Arubiano, a pone un krans na e monumento na Waalsdorpervlakte ariba “Dodenherdenking” diahuebs 4 di Mei 2017. Tambe presente tabata e esposa di Minister Plenipotenciario Amy Yrausquin/Roos y famia.
Prome cu esaki a tuma luga un encuentro na Cas di Aruba. Directora di Gabinete di Aruba Shandra John a yama e publico presente y a bisa di ta contento pa mira asina hopi studiante presente. Sra. John a bisa cu e conmemoracion ariba “Dodenherdenking” na Waalsdorpervlakte ta un lugar y monumento cu un significacion special, pasobra e monumento ta na e sitio unda durante di segunda Guera Mundial hopi persona cu tabata forma parti di e resistencia contra di e ocupacion Aleman a wordo fusila. Entre nan e hoben Arubiano Boy Ecury cu hunto cu otro miembronan di resistencia a haya su morto pa medio di un peloton di bala ariba 6 November 1944.
Finalmente Shandra John a bisa cu ta importante pa di e manera aki tene na bida e memoria y e storia di bida di Boy Ecury.
Despues tabata tin presentacion di e documentario “A Royal Affair”. E documentatio aki a wordo traha riba peticion di ex Gobernador di Aruba sr. Fredis Refunjol y e video ta duna un bista durante siglonan e nificacion di Aruba pa Reino Hulandes.
Na e monumento na Waalsdorpervlakte e studiantenan Arubiano Victor Jarzagaray y Britney Koolman a pone un krans acompaña pa e demas studiantenan, Shandra John, Amy Yrausquin y famia y Ivonne Navas di departamento di Enseñansa di Cas di Aruba
Na final e studiantenan a expresa di a haya e conmemoracion uno hopi interessante y conmovedor.