Varios ta hobennan cu ta preparando caba pa sigui nan estudio na madre patria Hulanda, pa cual minister Plenipotenciario, Sr. Guilfred Besaril, ta elabora mas ariba e preparacionnan cu ta tumando luga pa cu esaki.
Minister Besaril na Juni tabata un paar di dia na Aruba, pa prepara e hobennan cu dentro di poco lo ta bayendo Hulanda pa sigui nan estudio. Entre dia 4 y 5 di augustus, e studiantenan lo sali pa Hulanda. Esaki tambe ta e motibo pa cual Minister Besaril tabata na Aruba pa asina na un manera structura duna un guia pa ora nan subi avion y bay Hulanda, kico e studiante por spera ora cu e toca suela di Madre Patria.
Na momento cu el a bay Hulanda, Sr. Besaril a splica cu tabata bin bastante esfuerso tumando luga, pero no uno structura. Den pasado, 10 pa 20 aña pasa, semper tabata asina cu e studiante mester bay un siman di preparacion, un cierto guia y preparacion basico pa enfrenta e reto ey cu yama Hulanda. E ultimo añanan esaki no a tuma luga mas. Tabata tin iniciativanan priva. Pero e esfuerso cu Aruba Huis ta hacienda ta pa informa e hobenannan lo miho possible, pa asina ora nan yega Hulanda, pa nan concentra miho ariba loke nan a bin haci.
Si e studiante no tin nada regla, of cu e no ta compronde con e cosnan ta bay, esaki ta stroba e studiante den su estudio. Esaki tabata su prome bishita na Januari. Y e dos bishita na December, e ora na momento mas trempan ta bin topa cu e hobennan, pa ora nan bay haci e escogencia di nan studie, pa nan sa kico ta bay ta desaroyo den e proximo 5 pa 7 añanan ariba mercado laboral, pa nan sa den ki direccion nan kier bay.
Un di e problemann mas grandi cu e studiante ta topa cun’e ora di yega Hulanda, ta un luga di keda. Antes tabata mas facil pa yega inscribi. Awendia si e studiante tin suerte, e lo por haya un cita cu gemeente dentro di 4 pa 6 siman. Y tanten cu e studiante no ta inscribi, tur otro cos ta tranca. E no por habri un cuenta di banco, e no por cera un seguro. Ta pa es motibo ey ta purba di prepara e studiantenan lo mas miho posibel pa ora nan yega Hulanda. Esaki ta conta tambe pa hobennan di Corsou, Bonaire, etc. Tambe tin cu prepara cu studiantenan cu si nan tin intencion di bay studia un caminda, eigenlijk tin cierto stapnan cu mester tuma. Na Arnhem y Nijmegen e studiante mester inscribi su mes for di cuminsamento di October, pa bin na remarca pa haya un studentenkamer. No tarda pa haci e peticion, ya cu e por ta laat.
Minsiter Besaril a sigu bisa cu esaki ta informacionnan cu Arubahuis ta comparti cu e studiantenan. Arubahuis tin cierto contactonan cu ta yuda acelera e proceso. Pero si e studiante mes no a cana e proceso corecto, esaki por causa cu e por keda pega na comienso. Y esaki ta loke ta purba di evita. Esaki tin di haber, ya cu e ta varia di gemeente pa gemeente. P’esey ta purba di duna informacion pa cu ta posibel. Pa e studiante sa cu tin mucho mas cu Utrecht, Amsterdam, Rotterdam of Groningen. Esaki ta e cuater luganan cu studiantenan di Aruba ta bay studia, mientras cu tin hopi mas otro luga cu no ta mustra mucho dificil pa yega na un studentenkamer y ta duna e mesun tipo di estudio cu e kier haci. Ta door di duna mas informacion ta alivia e saturacion di e stadnan grandi aya na Hulanda.
Na nomber di gobierno di Aruba, ministe Besaril ta haciendo su maximo esfuerso y ta den un intercambio mas estrecho cu loke nan ta yama V&G, cu ta e vereningen di tur gemeente di Hulanda, unda cu ta purbando na e gemeentenan cu tin mas dificultad, pa asina agilisa e proceso.
Ta depende na e gemeente na Hulanda, unda cu e studiante bay inscribi su mes, ya cu si bay na un di e stadnan grandi, e ta super druk. Mientras cu si e studiante bay un otro stad menos grandi, e proceso por bay mucho mas facil. Ta p’esey ta purbando pa prepara e muchanan pa nan ta miho prepara pa ora nan yega Hulanda.