Tur aña nos ta haya nos mes cu e stof di Sahara un mas pisa cu otro y den 2017, esaki ta basta pisa pesey a aserca Dokter Wilmer Salazar cu ta splica kiko tur e stof aki por hasi cu bo salud.
E stof di Sahara di berdad ta existi y apesar cu e ta hopi leu, e ta yega den e region di Caribe, tur e stof acumula. Dus cada biaha cu un tormenta ayanan, lanta un cantidad di stof ayabanda, tur biento ta lastr’e, pasa via Africa, e ta yega den Caribe cu tur e consecuencianan pa salud.
Segun estudionan cientifico di e efecto cu e tin ariba naturalesa, a wordo comproba cu tur e mineralnan cu e stof aki tin, e ta beneficioso pa area di Amazonas, pasobra e ta alimenta esey. Pero di otro banda, tur e contenido di e stof, cu ta material, cu ta hero, mercurio, cilise, cu ta un componente di santo, cu ta afecta pulmon. Pero ademas di esey e ta lastra fungus, bacteria, virus, pesticide durante e paso den cierto areanan unda cu e uzo indiscrimina di e tipo di substancianan aki, ta crea un efecto.
Unabes cu e ta yega den e region aki, en general ta den temporada di calor, hopi biento y lo tin consecuencia pa salud humano. Hende cu ta alergico cu ta sufri di nanishi, astma, di stoma, malesa di pulmon, malesa di cuero nan lo sinti e efectonan. Ademas di esey, e cantidad di microorganismonan, lo causa tambe efectonan den cuero. Unabes e ta acumula den cuero, e ta causa grawatamento cu ta causa heridanan, cu ta causa infeccion e.o.
Dr. Salazar a sigui splica cu tin ora cu ta haci calor y e biento ta supla di manera constante, nan ta wak cu mayoria di hende, ya ta presentando cuadro di astma, cuadro di nanishi cera, wowitis tambe. Of lesion den cuero.
Por nota tambe cu ora biento supla duro, e stof aunke cu nos no ta wak’e, si bo laga bo auto bo ta mira cu e ta sushi. Esey ta stof cu ta wordo lastra y ta acumula y por ta dañino pa salud. E efecto di stof di Sahara ta consecuencia di salud, y su periodo ta for di Maart y e por dura te cu Augustus.
Mester tuma cierto recomendacion pa por lo menos alivia e efecto cu e tin ariba nos salud, segun Dr. Wilmer Salazar.