Discurso di Otmar Oduber diadomingo mainta ora cu e plataforma politico Pueblo Orguyoso y Respeta POR a keda funda tabata uno hopi emotivo y visionario, mustrando e obhetivonan di E Forsa Nobo di Aruba.
El a bisa cu e ta para dilanti cu hopi orguyo y satisfaccion. “Awe sigur no ta un dia mane cualkier otro dia. Awe ta un dia historico cu lo keda graba pa semper den nos memoria y den mente di nos futuro generacionnan.
Loke a trece nos hunto awe ta e stimacion enorme pa nos dushi pida baranca y e deseo profundo pa innova, renova y transforma nos pais den un mihor Aruba. Un Aruba nobo unda felicidad, harmonia y prosperidad por reina atrobe den tur skina, tur bario y tur hogar aki na Aruba.
Un sentimento di gratitud ta yena mi curason ora mi ta wak den e sala aki dos di mi yiunan mas chikito, e sosten di mi otro dos yiunan mayor den exterior, mi casa y mi mayornan cu manera pilarnan fuerte semper ta para mi tras.
Gradicido tambe na boso tur cu a acepta nos invitacion y duna acto di presencia awe pa asina expresa boso deseo di kier forma parti di E Forsa Nobo. Cada un di boso cu a mustra curashi y pasion pa para fuerte pa unificacion y pa duna un señal hopi cla na Aruba y mundo henter cu desde awe 11 di December 2016 tin un biento fresco ta supla aki riba nos isla, yena cu energia positivo y e conviccion y determinacion cu hunto nos POR. Hunto nos por construi un Aruba mas prospero, un Aruba nobo. Un danki di curason, pa e sosten di cada un di boso aki den.
Mi kier a gradici tambe cada un di e muhe y hombernan balente y capacita cu ta kere den e idealnan noble di nos plataforma y cu, faltando ainda 9 luna prome cu eleccion, ya a acepta e reto pa forma parti di E Forsa Nobo y participa na e siguiente eleccion di 2017 como candidato riba lista di nos plataforma politico nobo POR, representando nos Pueblo Orguyoso y Respeta. Joselin, Jacky y Michella masha danki pa ya caba ta parti di nos team.
Y last but not least mi kier a expresa palabranan di gratitud na señor Andin Bikker, cu a dicidi na nomber di PDR pa uni forsa cu nos plataforma y asina yuda crea E Forsa Nobo. Aunke pa hopi aña caba ami y Andin tabata colega den politica, ta e ultimo simannan aki mi a realisa con hopi nos tin en comun y con similar nos vision politico ta. Y en realidad ta strañami cu te awor nos camindanan politico a topa otro. Kisas ta destino, pero en todo caso tur cos ta sosode pa un motibo”, Otmar Oduber a expresa.