Otro siman Stichting Reclassering en Jeugdbescherming lo bay lansa su campaña di 55 aña di existencia. Segun Sandra Brown, e campaña aki, ta yam’e Double Up 55.
Dicon ta yame asina?
Pa bo ta un fundacion cu ta existi 55 aña den pueblo, yudando rehabilita nos hobennan, hende muhenan, hende homber den nos comunidad, no ta facil. Pero tin e animo pa sigui pa e siguiente 55 aña.
Reclassering ta un fundacion cu ta yuda ora un hoben cay cera, ora un hende mayor di edad cay cera ora un hende femenino cay cera. Reclassering tey pa duna e sosten na e famia. Durante tur e 55 aña, Reclassering tabata tin hopi reto. Aunke cu tabata tin e retonan, ainda tin e animo pa sigui. Si no saca un man, ken tey pa e personanan cu cay cera.
Awendia ta mira e siguridad den pueblo. Ta papia di dje tur dia. Pero ta aki Reclassering nan ta yuda y sinta combersa cu e personanan aki pa e actonan aki stop. Tin varios proyecto cu Reclassering a haci atrabes di e añanan. Nan tin por ehempel, ora tin problema cu school dropouts, a bin cu un proyecto cu yama Leerwerktraject. Den e proyecto aki, hobennan, banda di bay scol, nan ta haya tambe e oportunidad pa siña un trabao na un empresa pa despues nan por logra haya un trabao. Tin hot topics di hobennan, cu delincencia, hortando den casnan di hende, Reclassering ta aporta na duna guia individual y ta duna guia den grupo. E guia den grupo tin un proyecto cu yama Tops, caminda cu ta concientisa hobennan riba kico realmente nan ta bezig cun’e. Pakico ta haci daño na boso mes, boso, mayor, boso comunidad. Despues di un cantidad di siman cu nan ta sigui e proyecto aki ta mira cu e hoben ta bin realisa cu ta su pais, ta su famia y ta e mes e ta stroba di bay dilanti.
Stichting Reclassering en Jeugdbescherming Aruba mester di fondo pasobra tin hopi problema social entre nos hoben cu ta cay den man di husticia.
Nada no ta cay for di shelo, segun Brown. Banda di esey tin un programa ambulante cu ta concientisa riba e abuso di droga. E problema di gang tambe, con kier ataca e problema aki ta, door di bin cu un proyecto yama Banchi. E banchi cu ta monitor unda e persona ta bay, unda e ta pa e caminda cana bon durante nan periodo di rehabilitacion.
Pa esaki tambe mester di fondo, pa sostene. Reclassering ta un fundacion y ta nan tarea pa busca e fondonan pa completa e proyectonan aki. E proyecto pa siman di Reclassering, ta bay yama Double 55, manera ya menciona.
Comerciantenan, Reclassering ta bin bati na nan porta y ta pidi pa 10 biaha 55 comerciante, sostene Reclassering. Hendenan individual, por duna un aporte di 55 florin, cu ta simbolico pa e 55 aña cu nan ta laborando caba. Double e 55, esnan cu por afford mas, por duna 110. Asina ta pone cu esun cu tin un cartera chikito, toch cu kier mira siguridad den pais Aruba, den bo bario, bo por aporta na proyectonan balioso cu hobennan por siña y wordo kita for di e caminda robes cu ta haciendo. Asina no ta conta solamente riba sosten di Gobierno. Reclassering tambe kier pa tur hende sinti cu nan tambe ta envolvi pa combati criminalidad y yuda den rehabilitacion aki na Aruba.
Awor aki Reclassering ta enfoca riba e suma di 100 mil pa yuda cu e proyectonan, segun Sandra Brown.