Pa e ultimo cuater añanan Stichting Monumentenfonds Aruba ta trahando den cooperacion cu SUS Ateliers y Hogeschool Rotterdam caminda cu studiantenan di e di cuater aña di Bouwkunde ta bin Aruba pa nan Minor project y traha un plan pa un area of edificio.
Na 2013 e studiantenan a keda y traha den e area di Rancho creando e plan yama ‘ Perlanan di Rancho’ . Na 2014 a toca turno na San Nicolas y 2015 a traha un plan pa e area di Steenweg.
E aña aki e enfoke no ta riba un area completo pero e biaha aki lo traha un plan pa e edificio di Huize Veneranda conoci manera Ex Papiamento. E Edificio aki cu un caracter monumental no ta un edificio proteha ainda.
E edificio tabata originalmente di Veneranda y Frederico Arends, construi pa e conocido Dada Picus basa riba diseño di un cas na Cartagena. Actualmente e cas ta den man di e famianan ainda.
Na 2015 SMFA a firma un acuerdo cu ta encera cu si tin inversionistanan interesa den huur e edificio na largo plazo, SMFA lo por cumpra esaki y asina restaure debidamente.
E grupo di Hogeschool Rotterdam lo consisti e aña aki di 5 studiante y 1 begeleider cu lo keda den e area mes pa asina den un periodo di 2 siman crea un plan pa e edificio aki cu ideanan tambe di con lo por adapta e edificio den e situacion actual pa un uso temporal te na e periodo di restauracion.
E proyecto aki ta posibel un biaha mas danki na compania y instancianan cu ta coopera y contribui na haci esaki posibel. Stichting Monumentenfonds Aruba ta gradeci : Goddard Catering y Calloway Aruba cu e studiantenan lo por disfruta di un lunch merdia. Ali Baba express pa e desayuno pa e studiantenan. Peanuts Restaurant cu un dinner. ATA cu a contribui cu e welcome packages. ARA cu a coopera pa e studiantenan tin caminda pa por traha. Doña Clara Apartments y Superfood Aruba cu producto pa e studiantenan por desayuna mainta durante nan estadia y Catc y Aruba Aloe.