Na November ultimo a tuma lugar e di tres edicion di e Caribbean Conference of National Trusts and Preservation Societies na Curaçao. Stakeholders, profesionalnan y interesadonan den e area di patrimonio cultural y conservacion a asisti na e conferencia cu e tema e biaha aki ’ Making Heritage Matter’. E conferencia a tuma luga tambe den cuadro di e celebracion di binti aña di Willemstad riba e lista di patrimonio mundial di Unesco.
Durante e conferencia a trata diferente temanan cu tin di haber cu preservacion di herencia cultural. A pone enfasis na locual ta e herencia subacuatico, financiamento di preservacion di patrimonio, mercadeo di herencia arquitectonico y reutilisacion adaptativo di di herecia arquitectonico.
Directora di Stichting Monumentenfonds Aruba (SMFA), Anne Witsenburg, tambe a duna un presentacion riba e di tres dia di e conferencia caminda a trata e tema di financiamento di restauracion y mantencion di monumentonan . E directora a uza Monumentenfonds Aruba como ehempel di un fundacion cu sin subsidio ta logra cumpli cu e meta di adquiri, restaura y mantene edificio y obhetonan monumental pa asina preservanan pa futuro generacionnan.
A duna ehempelnan di proyectonan reciente caminda cu e fundacion por a conta tanto cu instancianan local como fondonan di monumentonan internacional pa hasi prestamonan na interes abou pero tambe ehempel di con instancianan local tambe ta inverti dor di patrocina parti di proyectonan di restauracion.
E directora a pone enfasis cu tur esaki no ta logra di su mes, e resultado aki ta debi na e conscientisacion cu e fundacion ta purba duna tocante importancia di nos monumentonan como parti importante di nos herencia cultural. E contacto continuo cu e sector financiero y comercial tanto local como internacional ta hopi importante mescos cu tambe e contacto cu e doñonan y of herederonan di e monumentonan cual ta contribui na agrega balor na e monumentonan cu e storianan di esakinan. Nos ta orguyoso di por a demostra e interes y cooperacion en general di e comunidad di Aruba ora ta trata di proyectonan tocante herencia cultural di Aruba.
Durante e conferencia tambe tabata tin actividadnan social na diferente areanan y edificionan monumental pa asina duna e participantenan ehempel di con na Curaçao a atende cu diferente areanan, entre otro pa busca inversionistanan pero tambe adapta e uzo di edificionan monumental.
Esaki tabata sigur un bon oportunidad caminda cu e team di SMFA por a intercambia ideanan y tambe crea conexionnan nobo cu diferente organisacionnan cu ta traha hunto den Caribe cu e mesun meta di conserva monumentonan.