Bao guia di Ministerio Publico, Cuerpo Policial di Aruba a cuminza ayera diaranzon 23 di november 2016, cu investigacion di un sucedido caminda dos miembro di un famia a bira malo despues di a bebe juice di fruta. Un di e victimanan a bira hopi malo despues y a wordo interna den Hospital den situacion sumamente grave. Ta ser sospecha cu tabatin veneno den e juice.
Investigacion lo mester mustra entre otro, na ki manera e veneno a yega den e paki. Te awor no tin ningun motibo pa pensa cu e veneno tabata den e paki di juice ora el a wordo cumpra na supermercado.
Den interes di e investigacion, no por publica mas detaye na e momento aki. Asina cu e investigacion permiti, lo saca mas informacion.