CARACAS, Venezuela- Un stampede den un club nocturno na Venezuela cu a desata door di un pelea diasabra anochi a causa morto di al menos 17 persona, entrenan ocho menor di edad. Esaki a wordo confirma door di e minister di Relacionnan Interior.
E incidente a tuma luga den e club social yama “Los Cotorros” mei mei di un serie di edificionan residencial di e urbanisacion di clase media El Paraiso, oost di Caracas, unda cu cientos di persona , hopi di nan studiante a bini hunto pa un fiesta prome cu nan graduacion.
Mei mei di e celebracion a cuminsa un pelea y un di e presentenan a activa un bom lacrimogeno paden di e local, cual a ocasiona panico entre e mad di 500 persona, según e minister di Relacionnan Interior, mayor general Néstor Reverol.
Julio Cesar Perdomo, un di esunnan presente na e fiesta y tata di un di e sobrevivientenan, di 17 aña, a bisa The Associated Press cu e bom lacrimogeno a wordo lansa den e baño y cu e portanan di e local a wordo cera, cual a stroba cu e asistentenan di e fiesta por a sali pafo.
Perdomo a bay cu yiu, cu tabata presenta lesionnan door di golpi, na e sede capitalino di Cuerpo de Investigaciones Científicas, Penales y Criminalísticas, den centro di e capital, pa duna su declaracion riba e incidente. Na e luga a acudi tambe famia di otro victimanan cu, cu cara di angustia y wowo cora door di yora, tabata consola otro mientras cu nan tabata warda pa haya informacion di autoridadnan.
Autoridadnan tabata purba identifica e mortonan, mayoria di cual a muri door di a stik y politraumatismo, según e emisora local Unión Radio riba su webpage.
Armas a bisa The Associated Press cu autoridadnan lo mester investiga tambe si e local tin permiso pa ricibi mas di cien hende. “Esaki ta un espacio no mucho grandi y esaki no mester wordo autorisa”, e consejal a bisa.
Mayoria di e victimanan a wordo traslada pa hospital estatal Miguel Pérez Carreño y e club social a wordo cera pa asina cuminsa cu e investigacio.
E porta di metal gris di e club a manece cera diasabra y den cercania di e club, por a wak keds y sandalianan posiblemente tabata pertenece na personanan cu tabata den e fiesta cual a termina den tragedia.
E opositor y habitante di El Paraiso, Jesus Armas, ta di opinion cu e minister di Relacionnan Interior mester splica con bin tin civilnan den posesion di bomnan lacrimogeno, cu solamente ta wordo uza pa forsanan di siguridad.
El a agrega cu algun luna pasa, otro incidentenan violento a keda registra den e salon di fiesta cu ta sa wordo uza pa e comunidad Ecuatoriano pa eventonan di siguidonan politico di e pais Andino y otro celebracionnan.
Fuente: BBC