Despues di hopi aña porfin sindicato STA a logra firma un CAO pa e trahadonan di Tierra del Sol pa cual sigur ta positivo segun Diego de Cuba, presidente di e sindicato.
Ta un contracto colectivo pa tres aña, cual a drenta na vigor desde 1 di Januari di e aña aki. E trahadonan a sali beneficia di dje. Nan lo conoce un aumento den nan salario di 7%, reparti den tres aña, den e temporada dificil aki cu ta pasando aden, toch ta algo bon. Tin cu bisa cu apart di esey nan a ricibi un tipo di gratificacion pa tur e añanan di servicio cu nan tin, locual cu tabta forma parti, manera un tipo di signing bonus. Pa esnan cu tin mas aña di servicio, a ricibi mas di e bono aki.
Tin cu bisa cu STA ta hopi contento cu toch a logra scapa e situacion, pasobra tur hende tabata sa cu Tierra del Sol no tabata bayendo den e bon direccion, pero ta contento cu e maneho nobo cu a drenta ultimo ora aki, aunke nan no ta haya nan den un situacion mucho di canta macamba tampoco, pero si cu tin cu bisa cu di parti di directiva di STA, tin mas confiansa den e hendenan aki cu tin confiansa den e gerencia anterior.
Pasobra e gerencia anterior tabata sconde hopi cos y no tabata comunica debidamente ni cu e sindicato, ni cu e trahadonan, locual ta tur contrario cu e gerencia actual di Tierra del Sol. E sindicato tin un relacion strak cu tin cosnan den veld cu tin cu wordo drecha ainda. Tin situacionnan fastioso na pia di trabao pa e trahadonan, caminda cu por considera como humiyante, pero e reglanan di wega tin cu wordo poni riba mesa. Awor cu tin un contracto colectivo tin un dekking, tin algo cu ta proteha e trahado den un futuro cercano. Manera cu ta mira na Aruba, companianan cu no tin un contracto colectivo, ta mira hefenan ta haci y deshaci cu nan, de Cuba a splica.