Diahuebs atardi a tuma luga e referendum cu sindicato STA a manda pidi pa asina representa e trahadonan di ASTEC cu no ta contento cu nan sindicato UPA. A papia cu Dave Martines di UPA, kende ta splica cu aunke STA a gana, ban mira si nan lo haci loke nan ta bisa.
Despues di October cu UPA a logra gana e confianza di e miembronan, despues e situacion a bolter. Pero pa UPA esaki ta keda mesun cos. Gana referendum ta co’i kens. Practica loke bo ta ofrece e miembronan ta loke ta conta pa UPA. Ta tiki jammer pasobra ta bin di un miho CAO na Aruba pa e ultimo 6 añanan y Martines ta puntra su mes dicon nan kier kibr’e.
Semper den tur trabao ta haya algun appel putri, cu no por mantene nan mes na trabao y no ta alcansa e aumentonan cu un sindicato ta pone y kier bruha tera. UPA ta biba cu e resultado. UPA lo keda existi y ta bay bek na su miembronan cu nan tin y ta bay wak con nan ta bay sigui padilanti. UPA lo keda existi, Martines a enfatiza.
E miembronan segun UPA tabata kier pa un CAO wordo firma. Nan tabata 2 aña den corte pa un CAO, pero tur hende sa esey. Na final den un articulo den e CAO, cu si esun no yega na un acuerdo, ta renoba su mes. Por a biba cu esey tanto como e compania tambe. Nan no tabata tin dolor di cabes, pasobra tur beneficio tabata wordo paga, pero e miembronan aki tabata kier otro manera. E ora nan a kies pa otro. UPA ta respeta nan decision, pero ta keda cu e lema cu gana referendum ta un cos, practica loke bo ta priminti, esey ta otro, segun Martines.