E competencia di Futbol den categoria B-mucha muhe riba calendario di Deporte Escolar di IBiSA a finalisa cu weganan hopi bunita y bon anima. E serie di wega pa e gran final tambe a wordo hunga riba veld di Compleho Deportivo Franklyn Bareño na Piedra Plat.
E weganan a cuminsa 2:30 di atardi y riba veld 1 a hunga e muchanan di Prinses Amalia School contra e muchanan di Scol Basico Washington. Mientras cu riba veld 2, e wega tabata entre e muchanan di St. Michael/Colegio Cristo Rey cu a subi veld pa midi forsa contra e muchanan di Colegio Laura Wernet Paskel. E weganan aki tabata di sumo importancia pa e scolnan, ya cu nan mester a bataya contra otro pa mira cua ta e scolnan ganador cu ta clasifica pa e wega final y hunga pa e titulo di campeon. E perdedor di cada wega ta esnan cu mester hunga pa defini e ganador di e tercer luga.
Apoya pa nan fanatico, cada scol a hunga un tremendo wega y a trece hopi emocion den cada hugada. E wega entre Prinses Amalia School y Scol Basico Washington ta termina cu e score di 1-2 na fabor di e muchanan di Scol Basico Washington, cu ta bira e prome scol cu ta clasifica p’e final.
E muchanan di St. Michael/Colegio Cristo Rey y esnan di Colegio Laura Wernet Paskel a bataya basta fuerte contra otro for di inicio te ora cu referee a fluit final di e wega. Defensa tabata hopi bon y niun di dos scol a permiti gol durante e minuutnan reglamentario y e wega ta finalisa empata na 0 gol. Esaki a pone cu nan mester a pasa pa tironan penal. Aki ta unda cu e muchanan di St. Michael/Colegio Cristo Rey ta sobresali den nan tironan riba gol y ta gana e wega 3 pa 0 y ta clasifica tambe pa e wega final contra di Scol Basico Washington. E muchanan di Colegio Laura Wernet Paskel ta pasa pa hunga e wega pa e di tres y cuarto lugar contra e muchanan di Prinses Amalia School.
Riba veld 2 e bataya tabata yen di tension y nervio pa e di tres y cuarto lugar. Finalmente ta Prinses Amalia School ta gana cu score di 4-2 y ta ricibi nan medaya como ganador di e tercer lugar.
Riba veld 1 ta e muchanan di St. Michael/Colegio Cristo Rey ta sali dicidido y ta hunga un bunita wega contra e muchanan di Scol Basico Washington, mientras cu di nan banda Scol Basico Washington ta purba defende te na ultimo. E wega a desaroya yen di emocion y cu apoyo di tur banda di veld y ta termina cu score di 4 pa 1 na fabor di St. Michael/Colegio Cristo Rey.
Na final por a mira e alegria riba cara di e muchanan, maestro y fanaticonan cu a gosa di un bunita atardi di futbol. St. Michael/Colegio Cristo Rey ta titula campeon di e competencia di Futbol Escolar den categoria B-mucha muhe y nan ta ricibi nan medaya y copa di campeon. Y e segundo lugar ta keda pa Scol Basico Washington, cu tambe ta ricibi nan medaya.
IBiSA ta felicita tur scol cu a participa y a haci e campeonato un exito y tambe ta gradici e refereenan, tur maestro, mayor y fanaticonan cu di un manera of otro a contribui, specialmente apoyando e muchanan. Un gratitud masha special ta bay na BLUE-FM Radio y Show y Mas pa e bunita cobertura di e weganan final, cu a wordo transmiti en bibo via 107.5 FM. E preparacion y enfoke ta sigui awo pa e ‘Weganan Interinsular’ cu ta tuma lugar na Aruba mes den luna di april 2017. Tanto St. Michael/Colegio Cristo Rey y Scol Basico Washington lo representa Aruba contra e scolnan di Corsou y Boneiro den e deporte di futbol mucha muhe den categoria B.