Sra.Yosmar Maduro – Sneek ta splica cu ora ABO a pidi’e pa subi lista a bisa si paso tin hopi cos cu no ta hayando atencion debido. Sra. Maduro- Sneek ta amplia.
Sra. Yosmar Maduro- Sneek a wordo acerca pa Sr. Elton Loei- A Tjam pa subi lista di partido ABO. Sra. Maduro- Sneek ta sigui bisa cu partido ABO ta para pa bienestar di Aruba, cual ta algo cu ta combini nos tur, e ta algo hopi importante. Y esey a pone su persona afilia su mes na e partido aki.
Despues di a caba su estudio di HBO na Hulanda, el a traha un tempo na Corte di Prome Instancia y aworaki e ta trahando na Biblioteca Nacional. Tambe e ta move ariba tereno social y cultura. E no ta kere den para na banda, y grita so. Si bo kier cambio algo, bo mester ta aden. Un di e metanan di partido ABO ta, cu nan kier un sociedad, unda ta reconoce proteccion di mucha y famia, y tambe fortificacion di famia ta esencial pa nos isla. Partido ABO ta pone e hende central, e individuo. Pero pa pone e hende central, lo mester wak ken a crea e hende. Y cuminsa na duna eynan balor. Unda cu mester pone Dios na prome luga y sigui conscientisa nos comunidad, ariba e.o., manera ya menciona, etica, norma y balor, integridad y respet. ABO ta kere cu mester cuminsa na origen di problema den sociedad. Pesey mester inculca e balornan den nos muchanan, eynan ta cumisna. Pa mañan bo ta crea un comunidad, di hende cu si sa di aprecia loke ta di nan y dunanan balor y tambe, haci otro aprecia esey. Cu no tin sentido grandi di compromiso pa cu isla y su hendenan. Asina lo sa di proteha patrimonio di Aruba. P’esey e fortificacion di famia ta asina importante. Un famia consciente ta crea un comunidad consciente, y un comunidad consciente ta consisti di hendenan cu awe, mañan, por tuma decisionnan serio y eherce nan ariba un forma etica, norma y balor. No con cu ta. Ta hendenan cu si tin Aruba na pecho. E mucha di awe, ta e futuro di mañan. Prepara e awe bon, ta garantia di un bon mañan.
Sra. Maduro – Sneek, kier a gradici Dios na prome luga, pa su guia y tambe, su casa y yunan pa nan sosten. E partido aki, ABO, si ta scoge pa abo. Si tin oido pa bo preocupacionnan. Y si ta duna ABO e oportunidad pa laga bo voz zona, laga bo opinion bin dilanti.
Dia 22 di September, si ABO tambe ta kere esaki, si ABO tambe ta kere den proteccion di mucha y di famia, sea sigur, cu bo ta vota pa ABO mes. Partido ABO ta simplemente e diferencia. Asina Sra. Yosmar Maduro- Sneek a finalisa bisando.