Locual ATA ta promove internacionalmente ta di sumo importancia, y considerando tambe e producto turistico Aruba, sigur mester pone mas atencion na nos producto. Asina tambe, aña pasa September ATA a lansa un proyecto nobo. Un Destination Development Plan pues produccion di un plan dirigi ariba Aruba su Desaroyo Turistico riba nivel di nos producto. Unda mester pone prioridadnan, areanan di proteccion di naturalesa, nos beachnan, tecnologia, nos medio ambiente, nos siguridad, avance economico. Sra. Ronella Croes, directora di ATA ta sigui splica.
Tur e aspecto nan aki ta inclui den e produccion di e plan aki. E plan ta yama “Cu Mira Pa Futuro”. Como parti di e proceso aki, hopi reunionnan a tuma luga caba. ATA a reuni cu mas di 170 persona caba, pa asina discuti den diferente plataforma kico ta e prioridadnan. Meta di ATA ta pa completa e plan aki, final di maart. Y mas cu claro, e aspecto di desaroyo di sostenibel di Aruba tambe tin su luga y tambe tin su atencion debido den e plan. Ta pa e motibo aki, ATA a dicidi di duna oportunidad na socionan internacional cu tambe ta a yuda produci e plan aki, pa duna nan e oportunidad tambe pa informa di diferente investigacion y diferente sesionnan cu nan a yuda ATA y cu nan a facilita riba nos isla.
Sra. Croes ta sigui bisa cu ta trata aki di Sustanaible Travel International y pakico e ta importante? Pasobra como parti di e plan aki, e plataforma amplio aki ATA a dicidi di forma parti di Sustainable Destinations Development of the Americas. Esaki ta un plataforma unda 11 isla den Caribe ta forma parti di dje. Meta di esaki ta pa midi unda nos ta para riba diferente aspecto di un desaroyo duradero pa nos isla . Y tambe formula accionnan concreto, pero tambe sigur haci uzo di e plataforma aki pa comparti informacion.
E expertonan ta pa yuda guia ATA den e ehecucion den tipo di proyectonan aki. ATA ta lidera e trayecto aki, pero hopi di e accionnan no ta den ATA den su man. Esaki ta un plataforma pa produci un plan y pa tin un bos comun y consistente den e sector turistico., pero tambe cu ayudo di otro stakeholders, di otro sectornan tambe, pa ta miho informa pero tambe cu accionnan concreto cu ta permiti ATA pa tin un participacion mas activo pa duna conseho, di kico ta resultadonan cu ta sali di un plan asina. Hopi di e accion lo cay bou di gobierno, pero ta importante pa delinea cu gobierno tambe ta forma parti di e plataforma aki pa medio di diferente autoridadnan. Otronan cu ta parti di diferente reunionnan cu a tuma luga. Esaki ta importante pa e desaroyo turistico di Aruba.
E desaroyo turistico di Aruba den un caminda hopi positivo Hopi a wordo logra, pero Aruba ta un isla chikito compara cu otro islanan den Caribe. Y ta hopi importante pa tuma e decisionnan cu ta hopi importante, no solamente pa e bishitantenan pero tambe pa e populacion di Aruba. Na december a comparti e mensahe aki hopi biaha: “Un Aruba dushi pa biba, ta un Aruba dushi pa bishita”. Esaki ta locual ATA kier saca afo di un plataforma asina ki. Y bin cu plannan concreto y tene cuenta cu e otro plannan cu a wordo traha den pasado, p.e. Aruba 2025. Ta tene cuenta cu e feedback cu a bin dilanti den tur e plannan ey, pero tambe pa actualisa esakinan tambe den e diferente reunionnan cu a tuma luga. Asina Sra. Ronella Croes, directora di ATA a finalisa bisando.