A yega tempo pa por tuma accion cu e animalnan riba caya y esaki ta keda un responsabilidad di gobierno y mes cos pa nos hende grandi cu no ta haya nan atencion segun Sr. Kenny Montero.
Sr. Montero a conta cu e la biba hopi aña na Bonaire, y cu su 16 aña el a bolbe bek Aruba. El a caba Colegio Arubano, HAVO den dia y VWO anochi. Na 2002 Sr. Montero a drenta Cuerpo Policial y desde e tempo ey e ta eherciendo e trabao di polis. E motibo pa cual el a dicidi di drenta politica, ta paso semper e ta un persona cu gusta yuda, yuda su prohimo, semper e ta stima su animalnan y semper el a ydua su animalnan. El a ripara cu den politica actual nan ta lagando e parti di sociedad un banda, cual ta nos hobennan, nos grandinan y nos adictonan ambulante. Ta door cu tin e bashi ey di personanan humanitario pa yuda e prohimo, el a dicidi di drenta politica. Pero dicon POR?
Kenny Montero a wordo acerca pa diferente partido politico den ultimo temponan. Pero el a kies pa e partido POR, pa motibo cu e ta nobo den politica, y POR ta un partido nobo. Den POR tin diferente hende cu tabata riba diferente lista, y esey ta pone cu por wak cosnan di diferente punto di bista. Esey ta un di e rasonann pakico el a subi lista di POR.
El a sigui splica, cu Kenny ta para pa humanidad, hende y animalnan. Manera hopi por a mira ultimo temponan, con nos animalnan ta wordo trata y esey ta un punto debil di su persona. E no por sigui wak cosnan asina sigui pasa. Pesey el a dicidi di step in y haci algo pa su bestianan.
Cosnan no por sigui asina. Segun Sr. Montero, mester cambia leynan tocante animalnan, y no por ta asina cu un hende ta maltrata un animal, e ta gewoon bay cera, ta tuma su declaracion y despues lag’e bay. Mester bin cu straf di prizon pa esunnan cu ta maltrata bestia.
Tambe Sr. Montero ta haya cu mester cumisna handle e situacion aki. Conscientisa muchanan na scol, tocante con pa trata un animal. Pesey a dicidi cu e schooljaar nobo, su persona como un agente policial, e lo cuminsa bishita e kleuter – y basisschoolnan pa siña muchanan como pa trata animalnan. No ta maltrato so, tin hopi animal ariba caya. Gobierno mester cumisna subsidia fundacionan cu ta bezig cu sterilasicacion di animalnan, ya cu esaki ta unico manera pa caba cu animalnan di caya.
E killbin ta wordo uza di un manera no digno pa nos animalnan. Nos bestianan ta wordo poni drumi na un manera no corecto. Hopi di e bestianan aki aidna bibo ta wordo tira manera cu ta paña nan ta y benta na dump.
Sr. Kenny Montero ta para pa oportunidad y progreso pa nos grandinan. Nos grandinan ta wordo discrimina. Den departamento laboral hopi biaha no ta tuma hende grandi den servicio y esey no ta corecto. Hopi biaha e hendenan aki ainda por. Mester dunanan un oportunidad. Pa loke ta estudio, un persona grandi, mester por sigui un opleiding ora cu nan kier, no matter nan edad.
Pa loke ta nos hobennan, hopi biaha nan ta wordo tilda di ta teribel y cu no tin respet. Pero kico ta wordo haci pa e hobennan? Nada. mester bin cu proyectonan despues di scol. Eynan e mucha ta wordo opgevangen y tin hendenan grandi cu ta voluntario cu ta yuda cu e desaroyo di un mucha. Esey mester por aki na Aruba.
E grandinan cu yiunan no ta den cas mas, tambe por bishita e centronan di bario. Nan por inculca e custumber di norma y balornan na e hobennan cu a wordo perdi caba. Tambe e parti di adicto ambulante cu ta un grupo cu ta wordo menosprecia den comunidad. E adicto ambulante cu kier yudansa, mester por haya e yudansa. E mester haya un persona asigna pa yud’e pa reintegra den comunidad. E programanan di rehabilitacion, segun Sr. Montero, mester ta mas efectivo. Bin cu ideanan nobo, hacinan mas eficiente pa salba e adictonan ambulante.
Por ultimo Sr. Kenny Montero a bisa cu e ta para pa un era nobo den politica. E no ta kere cu mester papia malo di otro, pero mester cuminsa laga den pasado loke a pasa den pasado. Traha cu cara pa futuro. E ta para pa un politica nobo, un cara nobo.
Sr. mr. Andin Bikker ta yama Kenny Montero bon bini den partido POR, reinforsando e plataforma Forsa Nobo, pa restaura e siguridad di nos digno pueblo. Sr. Montero tin un bista amplio den diferente topiconan y cu pueblo ta pidi atencion pa esaki.