Campeonato HEINEKEN di Aruba Softball Bond dedica na dos baluarte Sra. Bertha Wolf Croes y Eugenio “Tan” Helder a inicia den gran forma. Despues di un desfile colorido y bunita y alabes despues di e ceremonia unda entreotro a homenahea e dos baluartenan, e dos ekiponan den categoria AA a midi forsa. Angelo Arnold a tuma e monticulo pa Spuiters mientras e veterano Arjen Mathilda a inicia pa Pizza Hut Monsters. Spuiters ta coy bentaha 4-0 den e prome 2 inningnan pero mesora Pizza Hut Monsters ta reacciona no menos cu 5 careda den bom di 3 inning pa bolter e score 5-4 na fabor di Pizza Hut Monsters riba algun hit den combinacion cu 2 eror y un homerun inside the park di e hoben Lenny Ashby Junior. Spuiters sin embargo no ta entrega y den cabes di 5 inning, 2 coredor ta yega base unda Carlos Wester ta conecta un “clutch triple” cu dos out pa bari base empuhando 2 careda pa bolter e score 6-5 na fabor di Spuiters. Angelo Arnold ta preta brasa den bom di ultimo inning ponchando Rolando De La Cruz lagando e cu e carabina riba su lomba pa despues sali facil di Richinell Matos cu un fly pa right y terminando e wega dominando Derward Ruiz cu un rolling pa pitcher pa seya e victoria. Angelo Arnold ta resulta pitcher ganado lansando un “2 hitter” silenciando Pizza Hut por total y Arjen Mathilda ta bay cas cu e derota. Spuiters 6 careda, 3 hit, 3 eror y a laga 1 coredo na base. Pizza Hut Monsters 5 careda, 2 hit, 1 eror y 1 coredo laga na base. Miho bateadornan pa Spuiters ta Gilward Wester 1-1, Carlos Wester 2-1, Dereck De Castro di 2-1. Pa Pizza Hut Monster a conecta e unico dos hitnan Jerold Martijn di 2-1 y Lenny Ashby tambe di 2-1.
Mester remarca si cu algun hungado di Pizza Hut Monster a escoge pa subi Fadebook y insulta miembronan di umpires y directiva di ASB publicamente cual sigur ta inaceptabel riba un wega cu nan a perde. Esaki ta inaceptabel y tin regla estableci den rule book cual nan lo mester bay deal cun’e awor y sigur cu man duro. Corda cu Bo ta rebaha bo propio sponser “Pizza Hut” cu actitud asina kende ta invirtiendo pa promove e deporte y su negoshi. Deporte ta crea caracter y disciplina den un ser humano y na final di dia perdiendo Bo prome wega den campeonato unda tin mas di 23 wega ainda pa hunga no ta refleha cu algun deportista por reacciona cu un actitud faltando tur clase di respet publicamente di e forma aki.
Campeonato lo continua diasabra awo riba veld di Pos Chikito unda pa 5pm den categoria A-Klas Celebritie vs Blackhawks y pa 7pm Logros vs Predators. Dialuna 22 di Mei na Pos Chikito den AA Balashi Premuim vs Piratas. Fast Pitch a la carga.