Play Off HEINEKEN fast pitch di Aruba Softball Bond a continua diaranson ultimo riba veld di Kudawecha. Despues cu diadomingo Spuiters MIPA y Balashi Premuim a splits nan serie 1-1 a toca turno na e wega number 3 esta e wega desisivo unda ganado lo continua y perdedo lo yama ayo y lo mester prepara bek pa 2017. Den un tremendo wega unda Giancarlo Gomez a lansa 5 inning pa su ekipo entregando e wega gana na su relevo Jorge Santana, Spuiters ta rally den laat pa asina reclama e victoria importante y nan etiketa pa e siguiente serie di 3 wega. Jorge Santana ta resulta pitcher perdedor. Balashi a regala no menos cu 9 base por bola cual a pisa bastante den e wega aki. Henk Arnold di otro banda a cumpli cu otro hasaña den su carera. Henk Arnold ta bay 7 inning complete regalando solamente 1 base por bola pa pone e victoria riba su nomber. Score final ta 8-5 pa Spuiters. Spuiters MIPA 8 careda, 5 hit, 2 error. Balashi Premuim 5 careda, 7 hit, 2 error. Miho bateadornan pa Spuiters ta Gilward Wester 3-2, Angelo Arnold y Arzan Wester di 3-1, Yohan Ruiz di 1-1. Pa Balashi Premuim a destaca den causa perdi Filbert Thiel 2-2, Nathan Berkel 3-2, Djurwin Croes y Josmar Thiel di 3-1, Gerald Werleman di 4-1. Cu e resultado aki e ekipo kendenan porcierto ta debuta nan prome aña den AA a sa di termina campeonato regular na di tercer puesto y ta elimina nan contrincante number 4 pa asina avansa den e serie. Spuiters ta sperando awor riba e perdedor den e serie entre Royal Power y Pizza Hut Monsters pa asina hunga un serie di 3 wega contra un di nan. Ganado aki lo pasa pa final. Spuiters tabata tin su fanaticadanan “modelo” apoyando nan equipo bou dirigencia di Wendy kendenan a trece un ambiente total den parke Kudawecha. Diabierna awor pa 8pm na Kudawecha lo tin e gran final den A-Klas entre Piratas vs Celebreties. Piratas cu un victoria ta titular campeon mientras Celebreties ta enbusca di un victoria pa extende e serie pa diadomingo. Diadomingo merdia e proximo Serie den AA lo inicia unda Spuiters ta wardando riba su contricante. Softball fast pitch den pleno desaroyo.