Willemstad Curacao: Djárason 15 di mart 2017, den oranan di anochi Sentral di Polis a risibí notifikashon ku a señalá un SUV ku dia 14 di mart 2017 antisosialnan a usa pa komete un ladronisia ku violensia na un establesimentu riba Gosieweg. Informashon ku Sentral a risibí ta ku e vehíkulo aki ta bayendo direkshon di rotònde Brievengat.
Varios unidat polisial i VKC a dirigí nan mes na e sitio i a blòkia e rotonde. Na momentu ku e SUV tabata aserkando i a nota e unidatnan e la desviá i bai direkshon di Andres Belloweg. Polis a lòs tiru dirigí riba e SUV pa para esaki, pero sin resultado. Un unidat di VKC a kuminsá ku un persiguishon pero a pèrdè e SUV for di bista. Kontinuando ku un búskeda a topa ku e SUV den Sabana Hundu.
Okupantenan di e SUV a kuminsá lòs tiru dirigí riba e unidat di VKC. Seguidamente e sospechosonan a tira un supstansia riba e SUV i pega esaki na kandela pa despues kore drenta mondi. Brantwer ku a presentá na e sitio a paga e kandela. Ku yudansa di helikòpter di Warda Kosta polis a sigui ku búskeda di e sospechosonan den e área sin e resultado deseá. Durante kontròl na e vehíkulo di VKC a nota perforashon di bala na altura di e tapa di motor. Investigashon den e kaso aki ta kontinuá.
Imagen cortesia di: Colaborador Piloto