Sospechosonan den caso di asesinato di Sasha F. condena na 20 aña di prizon

0
RBC Juli 2018
ling and sons porciento
Funmiles-2018

Diaranson a tuma luga e sentencia den caso di asesinato di Wayaca, caminda cu Sra. Sasha F. a perde su bida. E dos sospechosnan, Jeffersona E. y Po Sin “Stevie” F. ambos a keda declara culpabel pa hues mr. Angela. Fiscal mr. Kardol a pidi 25 aña di prizon pa cada un sospechoso, pero diaranson, hues a condena nan na 20 aña cada uno.

ASESINATO
E dos sospechosonan Jefferson P. E. y Po Sin “Stevie” F., ta wordo acusa di dia 13 di September 2016, a tuma bida di un persona, door di los un of mas tiro ariba e persona aki. Consecuencia di esaki ta cu tanta di F., Sasha F., a fayece. Esaki, segun e acusado E., e caso aki tabata un atraco cu a bay robes, caminda cu e plannan tabata pa horta un suma di placa, cadena, telefon y tambe nan auto. E caso aki a keda posponi varios biaha y despues a habri e caso aki di nobo. Hues tabata kier mas prueba di e situacion financiero di F.

CASO
Durante tratamento di e caso, F. tabata para ariba cu e no tabata tin mester di e comete e atraco, ya cu e tin placa. Y cu henter e tratamento di e caso a bira un show. Hues a puntra J.E. kico e ta pensa riba e defensa di P.F. cu ta bisa cu P.F. tin placa y no tin problema financiero. J.E. a bisa Hues cu P.F. tabatin mester di placa. El a bisa cu P.F. kier a divorcia cu su señora y laga un cas na Morgenster pa su ex señora y yiu biba aden y e lo keda biba na Pavia Park. Segun J.E., P.F. a conoce un dama, pero e dama aki no por bay biba cerca dje hunto cu su mayornan, pa cual P.F. lo mester busca un otro luga di biba. El a bisa cu P.F. mester di cen pa varios cos. Un parti di placa lo tabata pa paga impuesto di container cu el a manda bestel. Gran parti di e placa lo tabata pa P.F. haya su mesun bida. Segun J.E., el a compronde di P.F., e victima lo tabatin 10 mil florin y cu lo tin un safe cu placa. J.E. a bisa Hues cu P.F. no a bis’e cuanto placa tin den e safe.

INVESTIGACION FINANCIERO DI F.
Despues cu ultimo biaha, hues a manda e caso bek pa hues comisario pa asina haci un investigacion mas profundo ariba e situacion financiero di F., Hues a bisa cu for di investigacionnan cu Fiscal a haci ta mustra cu no tin placanan ta drenta y sali manera normal sa mira di negoshinan cu ta bay bon. Na opinion di Hues, esaki ta mustra cu e negoshi no ta bay bon. Hues a remarca cu tin cosnan hopi straño. Remarcabel ta cu ta deposita placa cash y mesun dia e placa ta wordo transferi pa otro cuenta. Hues a señala cu pa luna ta 9 transaccion so ta sosode. Na opinion di Hues, esey ta hopi abou pa un negoshi. Tambe investigacion riba circulacion di placanan, a sali na cla cu Chinesnan no ta gusta warda placa den banco sino na cas. Tambe cu esunnan cu tin negoshi, lo haci transaccion di placa pa no paga cash.

LEGALMENTE PROBA
Hues mr. Angela ta haya cu ta legalmente proba cu E. y F. a planea e atraco hunto. Tabata F. cu a baha E. den cercania di e cas di e victima pa asina bay comete e atraco. F. ta esun cu E. a yama ora cu el a sali di e cas pa bin buske. Tambe hues a remarca cu e persona cu a bende E. e arma a bisa cu tabata tin un otro hunto cu E. dia cu nan a bay cumpra e arma. Ta F. a keda cu e arma. Biaha pasa hues a puntra pakico F. no bay polis, siendo cu e tabata tin e arma, el a contesta cu e tabata sinti’e menasa.
Esaki hues a desbarata for di otro ya cu ora cu nan a wordo deteni, den e combersacionnan cu nan dos tabata hiba, por a deduci cu F. tabata bon na altura kico a pasa y a hasta bisa E. pa e play loco pa asina e haya menos castigo.
Mester remarca cu durante full e tratamento di e caso, F. a keda para ariba su inocencia. Pero Hues a mustra cu tabata F. cu a duna E. e placa pa a cumpra e arma. Hues ta haya straño cu F. no ta puntra E. pakico e mester di e placa. Tambe cu ora cu F. y E. a bay na Palo Marga pa kima e pañanan, dicon e no a bay polis e momento ey. Tin tur indicacion cu F. tabata esun cu a planea henter e atraco.
Loke tabata fatal pa F. , tabata un combersacion entre F. y E., ora cu nan tabata wordo transporta pa Hues Comisario. Durante e combersacion, E. a bisa F. cu “bo tabata sa e pakico nan a gara nos?”. Niun momento F. a desmenti esaki. Tambe cu ora cu nan tabata na Palo Marga, e dicon F. no a bay warda di polis. Tur esakinan cu a pisa contra di F.

SENTENCIA
Hues ta haya legalmente proba cu F. ta complice di asesinato (doodslag) riba Sasha F. Tambe e ta haya legalmente proba di ta complice ariba intento di asesinato (poging tot doodslag) riba casa di Sasha. Loke no ta legalmente proba ta cu ta E. a tira ariba Chi Wai, yiu di Sasha. Esey ta algo cu, segun Hues, no por a wordo proba.
A tene cuenta cu circunstancianan personal y tambe cu e echonan. E caso aki ta uno cu a conmove comunidad. A kita bida di un persona. A tene cuenta cu nunca antes nan no a yega di haya nan mes envolvi cu husticia. Pero el a compara e caso aki di Sasha F. cu e caso di atraco na Bonaire, caminda cu’n agente policial a perde su bida.
Por lo tanto, e ta condena ambos sospechoso, E. y F., na 20 aña di prizon pa asesinato y complice di asesinato di Sasha F.
Defensa di E. lo conseha E. pa no apela, pero ta keda na E. pa tuma un decision. Cu buena conducta, kitando un tercera parti e sentencia por keda reduci y lo sinta pa mas o menos 13 pa 14 aña.

DEMANDA DI DAÑO Y PERHUICIO DI FAMIA
Hues a rechasa e demanda di e famia, pa e gastonan material di e famia. Segun mr. Angela, famia no a saca placa di nan saco mes, pero mas bien a uza placa di e herencia, cual no ta conoci cuanto placa cada ken lo a haya, un herencia cu na e momento ey ainda no a ni wordo reparti. P’esey e ta conseha famia pa cuminsa un caso civil pa cu esaki.

Pa loke ta trata e demanda pa daño inmaterial, hues ta concede na e peticion di famia. E reparticion ta como lo siguiente: Tata/casa ta haya 10 mil florin, Elaine (yiu muhe) ta haya 7500 florin y Chi Wai (yiu homber) ta haya 5000 florin.

E sospechosonan tin 14 dia pa apela e sentencia.

Comments

comments

C: Heineken
new india
dvg