Amsterdam, HULANDA- Un di e sospechosonan di e atake violento contra di dos homosexual na Arnhem, lo entrega denuncia. Segun e sospechoso, un di e dos hombernan a cuminsa dal prome.
Esaki segun e abogado di e hoben, Gerard Roethof, a declara den e programa di dialuna anochi Pauw. El a pidi polisnan pa imagennan di camaranan di siguridad. Si acaso ta existi esakinan, no ta conoci.
Segun Roethof, su cliente di 16 aña ta nenga cu odio contra personanan gay tabata motibo di e pelea. Tambe el a declara cu no tabata tin uzo di sker pa beton. Pero si el a admiti cu el a uza su mokete pa dal un di e hombernan den boca.
E abogado ta sigui bisa cu no ta berdad cu tabata trata aki di un grupo di hobennan Marocano. Ta trata di un grupo mixto di hobennan den cual tabata tin un hoben cu cabey blond y wowo blauw, como tambe hobennan di descendencia Marocano y Turco.
E pareha Jasper (35) y Ronnie (31) Vernes-Sewratan diadomingo anochi a wordo severamente critica despues cu nan tabata cana man teni, ora cu nan a sali for di un fiesta di gay na Arnhem.
Diasabra awo Gay Horeca Arnhem lo organisa un demostracion contra di violencia contra di personanan gay. Esaki ta relaciona cu e atake contra di e pareha gay. Riba e website di COC (Cultureel- en Ontspannings Centrum) Nederland esaki ta haci un yamado pa ta presente diasabra pa 5 or di atardi riba e Jansplein na Arnhem.
Polis a detene seis hoben kende nan edad ta varia entre 14 cu 20 aña, cualnan ta envolvi den e atake contra di e pareha gay.