E caso di e asesinato di e Chines Canades na Jaburibari, tin un rabo hopi largo su tras cu ta end up te den Canada mes y parce medionan di prensa Canades ya caba ta riba su pista. Ta trata aki di e sospechoso Michael “Teddy” Gibson di 30 aña, kende tambe ta wordo busca pa polis na Toronto, pa e asesinato di Julian Weekes. Gibson a wordo aresta durante un accion de pelicula door di polis aki na Aruba.
Toronto Sun a publica riba su pagina di noticia cu Gibson ta un asesino sospechoso liga na un problema di gang cu a laga un rastro largo di curpa atras, a wordo gara aki na Aruba. Manera cu nos tur sa, tabata tin un persecusion cu a cuminsa for di Palm Beach na e luznan di trafico cu a bin caba na e rotonde di Hato, unda cu e auto sospechoso a bolter den e drempel y den e auto tabata tin cinco persona aden, entre nan, e sospechoso Gibson, kende supuestamente ta envolvi den e asesinato di e Chines ya menciona.
Toronto Sun ta sigui detaya, cu mucho no por a haya sa di e caso, pero segun medionan aki na Aruba, a reporta cu tres hende homber y dos muhe a wordo aresta diamars despues di un persecucion policial ya menciona.
Fuente di Toronto Sun a confirma cu un di e sospechosonan, cual por a wordo mira riba e foto riba medionan na Aruba, ta wordo saca for di e auto accidenta door di polis y geboei – ta Michael “Teddy” Gibson.
E homber di 30 aña ta wordo busca pa e morto di Julian Weekes, 29, kende a wordo tira mata dilanti un bar den Queen St. E., cerca di Parliament St., dia 2 di April, 2016. Weekes tabata bandonando un velorio pa Ceyon Carrington, 29, kende a wordo tira mata, dianan prome na Leslieville.
Carrington y Weekes ta entre seis victima di asesinato – incluyendo un wela inocente – mata entre dia 23 di Maart, 2016 y dia 11 di Februari, 2017, den un pelea sangriento entre Sick Thugz y un offshoot, conoci como Halal Gang.
Michael Gibson, kende su famia Marcus Gibson ta entre e victimanan, ta encarcela na Aruba.
Polis di Toronto ta na altura di e aresto aki, pero no ta comentando te a e punto aki.
Canada tin un tratado di extradicion cu Aruba, pero polisnan na Canada tin cu warda den rij, debi cu Gibson ta envolvi den loke ta parce di ta un investigacion homicida riba Aruba.
Actualmente tin un caso den Corte andando, caminda cu tin 7 persona envolvi, mas e sospechoso ya menciona cu lo mester presenta dilanti di Hues, cu lo mester dicidi kico lo bay sosode den e caso lamentabel aki.
Fuente : Toronto Sun