Diabierna 20 di October 2017 na oficina di SER situa na L.G.Smith Boulevard 176, den presencia di Su Excelencia Gobernador suplente Sra. Yvonne Lacle- Dirksz, SER hunto cu un grupo di invitado y miembronan di prensa,a celebra su 30 aña di existencia.
A inicia e atardi cu inauguracion di e sala di reunion dedica y nombra na defunto colega Sr. Guido Reiziger, pa cual Su Excelencia Gobernador suplente y yiu di defunto colega Sr. Leroy Reiziger a corta e cinta.
Voorzitter di SER, Sr. Rudy Geerman a continua cu un discurso den cual entre otro el a splica cu aunke ta celebrando 30 aña di existencia di SER e inicio di SER ta data ya caba for di aña 1966 caminda partnernan social di Aruba tabata forma parti di SER Antias. SER a ser lanta inspira pa ILO den cual gobierno ta crea e oportunidad pa e partnernan social den comunidad delibera y duna conseho encuanto e maneho di gobierno riba tereno social economico. Aruba mescos cu e otro islanan den reino tabata tin’e tempo ey 2 representante den e conseho aki y un biaha pa luna nan tabata reuni y cada bes na un otro isla. Na 1987 despues di nos Status Aparte SER Aruba a ser funda.
SER den e ultimo 5 añanan a mira e necesidad di busca aliansa na SERnan internacional considerando e efectonan di nos mundo actual cu ta ser influencia pa medio di tecnologia y globalisacion. SER Aruba a estrecha su lasonan di cooperacion cu otro SERnan den reino y e asina den 2012 SER Aruba bira miembro di e Asosiacion Internacional di Conseho Social Economico y Organisacionnan Similar yama AICESIS. Siman pasa SER Aruba hunto cu SER Corsou a haci un bishita di trabao na Hulanda caminda a tene encuentronan cu SER Hulanda y institutonan y organisacionnan importante. Na e celebracion tabata t’ey presente como invitado tambe e Director secretario di SER Korsou Sr.Raul Henriquez cu tambe a hiba palabra. Sr. Henriquez a splica di e importancia pa fortifica e lasonan di cooperacion entre SERnan den Reino, den cuadro di hisa e nivel y calidad di funcionamento di e organonan.
Por ultimo e secretaris di SER Sr. drs. Felix Bijlhout a presenta un brochure informativo y a lansa e website nobo di SER. E programa oficial di e celebracion a termina cu un recepcion pa tur e invitadonan.