NORTH CAROLINA, Merca – E mayornan ta preocua y cu frecuencia cu rason, riba cuanto tempo nan yiunan ta pasa dilanti di pantaya.
Awo, un investigacion nobo ta sugeri cu ora e muchanan den riesgo di problemanan di salud mental, ta pasa hopi tempo cu smartphones of otro tecnologianan digital, tin un riesgo mas halto di problemanan di atencion of di conducta perturbador.
Pero no tur noticia ta malo. E investigadornan tambe a observa cu e tempo dilanti pantaya ta ofrece un beneficio. Ora cu e mucha y adolescentenan ta manda mas mensahe di texto den cualkier dia dado, parce cu nan ta menos ansioso y deprimi.
“E hayasgonan ey ta sugeri cu entre e adolescentenan cu ya ta na riesgo, un uzo halto por amplifica e problemanan existente,” e coautor di e estudio, Candice Odgers, a apunta.
Pero Odgers a añadi cu “nos no por afirma cu e uzo di tecnologia ta provoca e problemanan ey.”
Odgers ta profesor di psicologia y neurciencia den e Facultad di Salud Publico Sanford di e Universidad di Duke na Durham, North Carolina.
E dispositivonan electronico manera smartphones y tablets a bira asina omnipresente cu un estudio di 2015 a haya cu mayoria di e babynan tabata uzanan prome cu nan cumpli 2 aña di edad.
Otro investigacion ta sugeri cu e sitenan di medionan social, como Facebook, tin beneficionan perceptibel pa mucha, cu ta inclui oportunidadnan di educacion y conexion.
Pero tambe tin riestgonan potencial, manera cyberbullying.
Odgers y su colaboradornan a revisa poco tempo pasa e hayasgo di estudionan anterior. Y a haya “hopi mas evidencia di asociacionnan positivo entre e uzo di tecnologia di e adolescente y nan relacionnan social di loke nos a anticipa a partir di e temornan generalisa riba e uzo den aumento di parti di e adolescentenan,” el a comenta.
Pero Odgers a bisa cu “ainda nos sa hopi poco riba e conectividad constante of e patronchinan di uzo di e adolescentenan, tin efecto riba nan salud mental, relacion y desaroyo.”
Den e studio nobo, e investigadornan a duna 151 mucha di entre 11 y 15 aña di edad, smartphones. E muchanan tabata biba den vecindarionan pober di merca y a considera cu nan tabata den riesgo di problemanan di salud mental. Mas of menos un 60 porciento di e participantenan tabata color cla.
Smartphones tabata bip tres biaha pa dia durante un luna, avisando e participantenan pa nan responde brevemente na preguntanan riba con nan tabata sinti.
E muchanan tambe a responde na preguntanan riba con hopi nan tabata uza e tecnologia digital cada dia.
E investigadornan a haya cu e muchanan tabata pasa un promedio di 2.3 ora pa dia cu nan smartphones of otro tecnologianan digital. E cantidad promedio di mensahenan di texto manda den un dia tabata di 41.
E muchanan a reporta mas sintoma di trastorno di deficit di atencion cu hiperactividad y di trastorno di e conducta den e dianan cu mas nan tabata uza e tecnologia. E sintomanan di e trastorno di e conducta ta inclui gaña, un actitud desafiante y e incumplimento di e normanan, segun Biblioteca Nacional di Medicina di Merca.
Pero e sintomanan di depresion y ansiedad tambe tabata reduci den e dianan cu e muchanan tabata manda mas mensahe di texto.
Respecto na aumento den e problemanan di atencion y conducta den e dianan cu mas uzo di tecnologia, Odgers a bisa cu ‘ta posibel cu e tecnologia no tin culpa.”
“E hayasgonan ta sugeri cu entre e adolescentenan cu ya ta den riesgo, un uzo halto por amplifica e problemanan existente,” el a bisa.
Pero kisas no ta un circulo vicioso di un mayor uzo, mas problema y e ora ey un uzo incluso mayor.
E estudio aki ta aparece den e edicion di dia 3 di Mei, di e revista Child Development. El a wordo financia den parti pa Verizon Foundation.
Fuente: Health Day